A Miteu celebra os seus 30 anos con 19 representacións escénicas

Momento da presentación en Ourense da Miteu, ás portas do Teatro Principal.

A Miteu (Mostra Internacional de Teatro Universitario de Ourense) xa ten pechado o programa —nunha edición para celebrar—, que presentaron os representantes das institucións e empresas patrocinadoras. Celebrarase do 23 de abril ao 10 de maio por diferentes escenarios da cidade: Teatro Principal, Campus, Liceo, rúas e praza de San Martiño. A mostra chega á súa edición número 30 e faino cun amplo cartel, que incluirá dezanove representacións: trece das obras serán de grupos universitarios e seis de compañías profesionais. Abrirá o festival Teatro del Barrio, que chegará coa montaxe Infiltrados en Vox. O director da Miteu, Fernando Dacosta, sinalou que nesta convocatoria terán especial protagonismo aspectos como o auxe dos autoritarismos e a extrema dereita, a violencia contra as mulleres e a visión que se está xerando sobre as persoas a través da pornografía e as redes sociais.

volve a coruña

Toda Galicia. A vocación da Miteu está clara dende o mesmo momento do seu nacemento, e este ano volverá haber pleno galego, logo de que recuperase a súa actividade o grupo da Universidade da Coruña. Estará o 7 de maio coa súa montaxe Cartografar sen norte. Pola mostra pasarán os grupos das aulas universitarias de Lugo, Ourense, Pontevedra, Santiago, Vigo, Navarra, Castela e León, Covilhã e Burgos.

cincuenta países

Máis de 6.000 actores. Dacosta salientou o feito de que pola Miteu levan pasado, coa incorporación este ano de Dinamarca, grupos de medio cento de países dos cinco continentes. Unha traxectoria, a destes tres decenios, que sumou 6.000 participantes vencellados aos grupos que viñeron a Ourense —este ano serán 210 persoas— e 170.000 espectadores. «Foron moitas vivencias e moitas aprendizaxes nestes anos», sinalou Dacosta —que organiza a Miteu xunto aos seus compañeiros de Sarabela.

MÉXICO E DINAMARCA

Muller e corpos. Xunto á tradicional presenza de Portugal, este ano chegarán grupos de Dinamarca e México. A compañía de danza Granhoj traerá á Miteu o espectáculo Unha Eva e un Adán —día 28, ás 20.30 horas—, proposta que desafía as convencións ao presentar os corpos nus no escenario «como un contrapunto á imaxe distorsionada que se proxecta nas reses sociais nestes tempos». O recurso dos rapaces á pornografía a través das redes e o culto ao corpo son tratados nesta montaxe que reflexiona sobre a naturalidade das persoas e a súa representación nas culturas mediáticas. O 6 de maio, o grupo Carla Novi, de México, porá en escena Luchadoras, unha peza que é un drama social sobre a situación da muller na sociedade mexicana e as violencias ás que están expostas no seu día a día, contado dende o colorido mundo da loita libre mexicana.

CURSO, SON E MOSTRA

Actividade complementaria. Fiel á súa tradición, a Miteu acolle un programa que promove actividades sobre música, fotografía e formación. Russo Nnandong, de Guinea, impartirá o obradoiro Creación do corpo reflexivo os días 3 e 4 de maio. Lucía Aldao ofrecerá un concerto o 24 de abril, e o Teatro Principal exhibirá a mostra de imaxes Mo(ve)mentos, sobre o proxecto da Casa Vella de Allariz.

Institucional

Apoio. Representantes da Consellería de Cultura, a Universidade de Vigo, a Deputación, o Liceo e Cervexas Esmorga participaron na presentación. Anxo Lorenzo, da Xunta, salientou a importancia dun proxecto «que suma tres décadas conectando profesionais e estudantes de Galicia con artistas de distintas partes do mundo».