3.000 persoas no festival As Nosas Músicas: «Viva a música e siga»

O campo da festa de Couso (A Estrada) volveu ateigarse este luns pola noite na celebración da vixésimo sexta edición do festival As Nosas Músicas, organizado polo colectivo A Xesteira.

Os Melidaos, Coanhadeira, Os Carunchos e Tiruleque convidaron aos presentes a bailar ata ben entrada a madrugada mentres que Art-Monium ofrecía animación a pé de campo.

Segundo os cálculos da organización, entre 2.500 e 3.000 persoas puideron concentrarse no campo da festa na hora punta, sobre as once da noite. Algunhas delas fixeron uso da zona de acampada e prolongaron a festa ata a mañá do martes festivo.

No transcurso do festival fíxose entrega do sexto Premio As Nosas Músicas á asociación Xermolos de Guitiriz, que organiza o popular Festival de Pardiñas, que este ano cumpriu 44 anos cunha saúde inmellorable. O festival de Couso leva o mesmo camiño. A valoración da organización é sinxela e contundente: «Viva a música e siga».