Na Estrada en Galego, un xeito de impulsar o idioma no comercio local
A Estrada
Case 30 establecementos participan na iniciativa creada por Andrea Mosteiro
11 Jul 2021. Actualizado a las 10:40 h.
O 9 de febreiro de 2020 naceu na Estrada un proxecto decidido a fomentar e visibilizar o galego no comercio local. A súa creadora foi Andrea Mosteiro, unha estradense de 16 anos que, consciente da perda de falantes nos últimos anos, quixo aportar o seu grao de area para impulsar o idioma.
A semente de Na Estrada en Galego plantouse en novembro do 2019, cando Andrea entrou na tenda 4 Eco Loan. «Entrei para mercar unha bolsiña dunha artista de Forcarei e gustoume moito o lugar, ademais estaba todo en galego e as propietarias, Loli e Ana, foron moi agradables. Conectei ben con elas», lembra Andrea, que a raíz deste encontro decidiu crear unha especie de asociación de comerciantes que usaran a lingua galega.
O traballo de Andrea consiste en difundir a través da páxina de Facebook de Na Estrada en Galego os contidos dos comercios que se adheriron a esta iniciativa. Polo de agora son 28, aínda que asegura que axiña chegarán a trintena. A páxina ten máis de 600 seguidores e dende xaneiro deste ano tamén conta cunha conta de Instagram.
Andrea tamén axuda ás empresas a mellorar o seu galego, facendo correccións e normativizando os textos. Incluso fai campañas ao estilo do Dígocho Eu da TVG para axudar a coñecer mellor o noso idioma e dun xeito máis ameno.
Na Estrada en Galego medra ao son dos tempos, participando en colaboracións con youtubeiros como Fran da Lobeira, ou a cantante Patty Castro. «Calquera persoa amante da nosa lingua pode botar unha man no que queira», sinala. Tamén comezarán a colaborar coa Mesa de Normalización Lingüística no proxecto Abertos ao galego o que supón un gran paso adiante no seu obxectivo.
Estudante do Antón Losada, Andrea observa de primeira man como cada ano os máis novos están a perder o uso habitual do galego. «Vivo nunha burbulla porque no Losada hai grupos de moitos galegofalantes. No bacharelato estaremos nun 80 ou 90 %, pero é curioso como en primeiro da ESO apenas o 40 % usa o galego como lingua nai. No mesmo centro vense grandes diferenzas», afirma.
Esta tendencia á baixa de falantes é un estímulo para Andrea, que segue traballando arreo para manter vivo o galego nas rúas e nos comercios da Estrada a través da súa labor desinteresada pola cultura que ama.