Moeche divulga a Feira do Queixo en Ourense, no Salón de Turismo Gastronómico

A sétima edición da Feira do Queixo de Moeche terá lugar o 16 de marzo de 2025. A alcaldesa, Beatriz Bascoy, e o técnico municipal de Turismo, Ramón Carballeira, presentaron o evento este domingo no Salón Internacional de Turismo Gastronómico Xantar, en Ourense, dentro do posto da Deputación da Coruña.

Ademais «da posta en valor» do recinto feiral e da promoción do queixo de Moeche, a rexedora subliñou que a feira «naceu co obxectivo de apoiar ao sector leiteiro e do queixo artesán, ligado á elaboración tradicional, produtores e comercializadores ligados ao territorio, e que coa súa actividade coidan del».

Carballeira falou dos atractivos turísticos do municipio. Os asistentes degustaron queixos de Lácteos Moeche e de Bardaos, acompañados con pan de pasas, de chía e de chocolate da empresa local Panadería Santa Cruz e marmelada de tomate elaborada por AyCarmen-Farolillos no Centro de Transformación Agroalimentaria A Fusquenlla.