«Teño a mellor profesión do mundo»

Kiko da Silva (Vigo, 1979) é licenciado en Belas Artes pola Universidade de Vigo e recibiu, entre outros premios, o Ourense de Banda Deseñada 1996 e o Castelao de Banda Deseñada 2014. Os seus traballos poden seguirse na súa web ogaraxehermético.com, no blog kikodasilva.blogspot.com e na súa conta de Twitter @dasilvakiko

-¿Quen foi o causante de que sexas ilustrador?

-José Ramón Sánchez, o debuxante da televisión dos anos 80.

-¿Que é o que máis che gusta de ser ilustrador?

-Temos a mellor profesión do mundo. Por eso nos queixamos, para que nos paguen a pesar diso.

-¿E o que menos?

-Ser autónomo en España é unha auténtica tortura.

-¿Quo consello lle darías a un ilustrador que estea empezando?

-Eu lle diría que nesta profesión as matemáticas van ser as súas mellores aliadas, que estude.

-¿Como definirías o que é a ilustración?

-Un idioma universal.

-¿Un ilustrador emerxente ao que seguirlle a pista?

-O francés Cedric Babouche.

-¿Cal é para ti o mellor ilustrador da historia?

-Bill Watterson, o creador de Calvin and Hobbes.

-Se non foses ilustrador, ¿que che gustaría ser?

-A verdade é que sempre quixen ser astronauta.

-¿Que encargo che gustaría recibir?

-A dirección de arte dunha película de Hayao Miyazaki.

-¿Que che gustaría preguntarlle a un ilustrador?

-¿Que marca de cadeira usas? Porque eu, despois de tantos anos, teño as costas esmendrelladas.