A mellor orquesta do século XX

Folgoso do Courel

Francisco Albo Monforte / La Voz

Unha actuación dunha das diversas formacións que tivo a orquestra Os Padernes ao longo da súa traxectoria

A localidade Vilamor —no municipio de Folgoso do Courel— celebrará este sábado as súas festas de San Vicente, que ademais do tradicional «baile dos toxos» comprenderá unha homenaxe á orquestra Os Padernes, a formación musical máis popular da serra durante o século XX. O festexo será organizado pola asociación sociocultural O Quintairo, de recente creación.

A homenaxe á orquestra Os Padernes comezará ás 18.30 horas e consistirá nun acto conmemorativo ao que asistirán familiares de varios antigos membros desta formación. Na actualidade están case todos eles falecidos. «O único que queda vivo era un que tocaba a batería, coñecido por Antoñín de Eiriz, e cremos que vive cerca de Santiago ou de Arzúa, pero non conseguimos localizalo», explica Manuel Vila, presidente da asociación organizadora. «Tampouco sabemos cales son os seus apelidos», engade. Ao mesmo tempo mostrarase unha colección de fotografías dos antigos membros desta formación musical.

A orquestra Os Padernes estivo en activo desde principios da década de 1910 ata 1984. Durante ese tempo animou todas as festas populares que se celebraban na serra do Courel e nos seus arredores. Ao longo da súa traxectoria contou con cerca de trinta músicos diferentes, pero o más habitual era que estivese formada por sete compoñentes. Os instrumentos máis empregados pola orquestra eran a trompeta, o clarinete, o saxo, o acordeón, o bombardino, o fiscornio, batería e a gaita. No 2014 foi inaugurado na localidade Paderne —de onde procedían a maioría dos membros das súas primeiras formación— un monólito na súa memoria. Por iniciativa do músico Xosé Lois Foxo, natural do municipio, ao mesmo tempo publicou un libro-disco que recollía unha selección de temas musicais interpretados pola orquestra e gravados durante unha festa celebrada na parroquia de Visuña en 1974.

A principal peculiaridade das festas de San Vicente de Vilamor é o baile dos toxos, que recrea a tradición local de bailar sobre un terreo cuberto destes arbustos cando coincidía con épocas de nevada. Manuel Vila sinala que este ano utilizaranse toxos recollidos na propia parroquia de Vilamor, o que non se puido facer os últimos anos, xa que os ncendios forestais do verán do 2022 queimaron a vexetación silvestre da zona. Os organizadores tiveron que recoller os toxos na aldea da Pendella, pertencente á parroquia de Folgoso. «Pero desde entón a vexetación xa se rexenerou e agora podemos usar toxos da nosa parroquia», explica Viña.