Reaxustes eléctricos nos impostos

Hai días La Voz de Galicia publicaba unha interesante páxina sobre a contaminación que xeran os motores de gasóleo, comparados con aqueles que son de gasolina.

Do informe, elaborado por tres expertos de diferentes áreas do coñecemento, logo se deducía que é difícil decidir entre esas técnicas de motorización pois cada unha ten vantaxes e inconvenientes. Os especiais de automobilismo de La Voz tamén se ocupan de mostrar os avances da propulsión con gas natural, hidróxeno, eléctrica con baterías, híbrida... Todo o lido permite albiscar un futuro diferente neste eido da actividade humana.

Na automoción pártese de que petróleo e gas non faltan no noso globo aínda que captalos sexa cada vez máis difícil, o cal implica maiores custos, a repercutir no peto do usuario de combustibles tradicionais. Na maioría das economías, a gasolina, o gasóleo e o gas postos á venda nas estacións de servizo levan sobre o prezo en orixe unha grande porcentaxe de impostos con destino ás arcas do Estado.

Fronte a isto aparece unha nova realidade. O prezo da carga das baterías dos coches eléctricos para un percorrido de centos de quilómetros vén sendo de algún euro. Ou sexa que, se a compra de coches de motorización eléctrica se populariza (xunto coa híbrida recargable), van caer os ingresos das administracións públicas por impostos aos combustibles. Terá que haber «reaxustes eléctricos».

Cousas veremos.