Poñerse en forma

Estamos xa preto do verán e proliferan en todos os medios de comunicación, incluídas redes sociais, os anuncios e consellos para poñerse en forma.

Algúns deles non ocultan a súa verdadeira intención, que non é mellorar a saúde, senón que ao quitar de encima a roupa que cobre o teu corpo no inverno te vexas cun aspecto estupendo se es novo, e un pouco menos deteriorado se xa acumulas moitos anos.

Eu atópome nese último apartado e non pensaba facer máis nada que o que fixen durante toda a pandemia: andar seis quilómetros diarios e levantar unhas ridículas pesas de 1,5 quilos, que non estou segura de que sirvan para algo, pero que mas recomendou unha amiga moi optimista. E é ela a que agora me pasou un folleto cuns exercicios que duran só trinta minutos e que repetidos tres veces todos os días durante un mes fortalecen «o tren superior e o inferior», así o di e así o transcribo, por se fosen útiles para alguén: Thruster, man maker, press de peito, jumping jacks, culs de bíceps, burpees, mountain climbers, frog pump, squat, reverse nordic curl, lunge, kneeling get up, crunch modificado e ponte de glúteo bird dog.

Acordeime de que García Lorca dicía do verso de Rubén Darío «que púberes canéforas te ofrenden el acanto» que el só entendía o «que»… Eu, do folleto ximnástico, que vén sen debuxos nin algunha outra información, só entendo os «de».

Así que, para empezar co «ritual», vou ver se poño en forma o meu inglés, e despois xa veremos.