Terzos e quintos

Antes de Internet, cando quedabas cos amigos no bar para tomar unhas cervexas, se chegabas con moita sede e contabas con marchar pronto, pedías un terzo. E se tiñas pouca sede, e contabas con que cada un pagaría a súa ronda, pedías un quinto. O sábado, Sánchez citouse coa prensa, e informou de que acababa de pedirse un terzo: cambiou a dirección de sete dos 22 ministerios. O fixo no lugar de sempre, ese local tan amplo que permite reunións de ata 22 persoas, co que unicamente tivo que facer algúns pequenos axustes no espazo (Función Pública a Facenda, ou a Portavocía a Política Territorial). E felicitouse, explicitamente, por ter rexuvenecido e feminizado o colectivo. Un colectivo renovado nun terzo co que parece mandar outras tres mensaxes máis, só que de forma implícita. Por exemplo, ao substituír ao fronte de Política Territorial a quen desde o PSC impulsaba diálogos cos independentistas cataláns coa modificación da estrutura da organización territorial do Estado enriba da mesa, por unha militante do Partido en Castela-A Mancha, filial máis proclive a manter o statu quo autonómico. Ou substituíndo a ministros e ministras cun perfil e traxectoria máis independente e profesional en departamentos de peso como Exteriores, Xustiza ou Ciencia (Laya, Campo, Duque; e na propia Moncloa a Redondo) por persoas cuxa carreira profesional ten máis que ver co seu compromiso coa militancia socialista (Albares, Llop, Morant, e López). Ou, en terceiro lugar, potenciando a Vicepresidencia de perfil técnico, capacidade de interlocución coa Unión Europea e de maneiras prudentes e ortodoxas (Calviño), en detrimento dun perfil máis político, menos conciliador, e máis heterodoxo e imprudente (Calvo).

Tamén mandou, como xa fixera cando Pablo Iglesias decidira cortarse a coleta, outra cuarta mensaxe explícita, aínda que non expresada verbalmente. O presidente manda moito, pero manda só sobre case as catro quintas partes do seu numeroso Consello de Ministros e Ministras. No quinto restante non manda nada: Traballo e Economía Social (coa súa Vicepresidencia), Dereitos Sociais e Axenda 2030, Igualdade, Consumo e Universidades, seguen igual, co mesmo grao de feminización e rexuvenemento.

Sánchez pedíuse un terzo. Pero un ten a impresión de que realmente o que quería pedirse era ese outro quinto. Como se facía, nos tempos anteriores a Internet, cando un contaba con estar moito tempo no mesmo sitio coa mesma compañía, e por prudencia se pedían quintos, e non terzos. De Estrella de Galicia, naturalmente.