Responsables os concellos?

Tras a publicación do meu artigo Tirar o pan ao lixo, un lector que aparece como jamo 6278 envíame desde A Coruña a seguinte información sobre a recollida do lixo e os contedores marróns de residuos orgánicos: «As comunidades autónomas teñen competencia nestes temas. Aquí, a Xunta de Galicia ten o control de Sogama que, en moitos concellos, encárgase de recoller os residuos. O Goberno central pode impulsar leis de bases, pero nos contedores non ten competencia». 

Como xa dixen noutro momento, os contedores marróns permiten reciclar os restos orgánicos (peles de plátanos, cascas de ovo, pan reseco) e reincorporalos á natureza , darlles, digamos, nova vida. En Madrid abundan eses contedores, pero, ao parecer, e segundo informacións que vou recibindo, son moitos os concellos nos que non existen.

Manifestaba eu o meu desexo de que a cidadanía castigase nas urnas aos culpables desa incuria, pero, desgraciadamente, puiden comprobar que, a pesar de que somos moitas as persoas que nos esforzamos en reciclar os residuos orgánicos, son máis as que se despreocupan do tema. Así que, é unha loita perdida. Véñenseme á cabeza as palabras de Mariano José de Larra: «Escribir en Madrid es un monólogo desesperante y triste para uno solo. Escribir en Madrid es llorar». Con todo o respecto cara a ese gran escritor, co que non pretendemos compararnos, senón aclarar os nosos sentimentos, supriman o nome de Madrid e poñan o do seu concello. Así nos sentimos os que non nos movemos por intereses de partidos, senón polo respecto ao medio ambiente e á natureza; non desesperados, porque a esperanza é o último que se perde, pero tristes, moi tristes.