Viola a súa propia filla, un bebé dun ano

A noticia saíu en todos os medios informativos. Eu ía titular este artigo Monstros, pero iso implica un xuízo de valor, e pensei que é mellor deixar que cada lector reflexione e saque as súas propias conclusións. Os feitos obxectivos son que se trata dunha parella: el ten 25 anos e ela 22. El violou á súa filla e ofrecíaa polas redes para que outros puidesen facer o mesmo. Pregúntome si ese bebé foi produto dun descoido, ou dunha violación. Ou quizá planearon ter un bebé para utilizalo como medio de gañar diñeiro ?

 Tamén me pregunto como foi a vida desas persoas para que cheguen actuar dunha forma que asquea e arrepía a todo o mundo. En que familia naceron, como se criaron, que lles fixeron para que se dediquen a utilizar á súa filla de tal forma? É posible que eles sufrisen un trato similar e que estean a repetir un patrón herdado: foron maltratados e por iso maltratan. É un feito que se repite con frecuencia, aínda que sexa difícil entender que quen foi vítima queira converterse en maltratador.

A Unidade Central de Ciberdelincuencia recibiu un aviso da Homeland Security Investigations de Estados Unidos que descubriu que o individuo descargaba e difundía nas redes sociais vídeos de pornografía infantil nos que os menores eran explotados sexualmente. Iso foi o que permitiu descubrilos e detelos. Eu non podo evitar velo, polo menos a el, como un enfermo mental, alguén incapaz de distinguir o ben do mal, e que ela actúa baixo a súa influencia. Desde o comezo hai na súa conduta algo enfermizo que a min inclíname a velos como vítimas dunha sociedade que —desculpen que volva ao meu título inicial— procrea monstros.