A alcaldesa de Trives, Patricia Domínguez, e o edil Fermín Santoveña incorpóranse á comisión de Patrimonio en representación de la Fegamp

 A alcaldesa da Pobra de Trives, Patricia Domínguez, e o concelleiro Fermín Santoveña incorpóranse á Comisión de Patrimonio en representación da Federación Galega de Municipios e Provincias (Fegamp). Foron designados para exercer funcións no Consello Territorial de Patrimonio Cultural de Galicia (Ourense), a alcaldesa como titular e o edil como suplente. Así foi comunicado á Dirección Xeral de Patrimonio Cultural da Xunta de Galicia.

Ata o momento, o representante deste órgano era Francisco Magide, ex alcalde do Concello de Parada do Sil. A rexedora da Pobra de Trives, Patricia Domínguez, agradeceu a confianza da Fegamp neste nomeamento e asegurou que será beneficioso para o Concello da Pobra de Trives, destacando o gran valor dos seus elementos patrimoniais.

A Federación Galega de Municipios e Provincias (Fegamp) é unha entidade asociativa constituída por 313 concellos galegos, as 4 deputacións provinciais e as 9 entidades locais menores existentes no ámbito territorial de Galicia. Naceu en 1988 co obxectivo de promover, representar e defender os intereses dos organismos locais galegos. Con sede única en Santiago de Compostela, a Fegamp conta cun corpo administrativo propio e cuns órganos de goberno que se renovan cada catro anos en función do mapa político municipal galego.