Luis Álvarez Pousa, gañador do Premio de Xornalismo Xosé Aurelio Carracedo

O xornalista ourensán Luis Álvarez Pousa (Trasmiras, 1948) foi galardoado co XXXIII Premio de Xornalismo Xosé Aurelio Carracedo «pola súa longa e intensa traxectoria profesional». O xurado do premio, outorgado pola Deputación de Ourense, destaca o labor de Pousa como «formador das primeiras promocións de xornalistas galegos, o seu compromiso co xornalismo cultural e a súa capacidade para xerar pensamento e debate na sociedade desde a revista Tempos Novos, con 329 números consecutivos desde 1997».

O presidente da Deputación, Luis Menor, comunicou esta decisión ao galardoado, que compaxina a súa profesión coa docencia, e expresoulle os seus parabéns por un «merecido recoñecemento» a un labor tan necesario e complexo como «a promoción da cultura a través do xornalismo».

Licenciado en Xornalismo pola Universidade Complutense, ademais de en Teoloxía pola Universidade Pontificia Comillas e doutor en Historia Contemporánea pola Universidade de Santiago de Compostela, Álvarez Pousa iniciou a súa traxectoria profesional na delegación de La Voz de Galicia en Ourense, e foi o seu primeiro cronista político na Transición.