«De Campos a Campos» pecha en Pontevedra a Festa dos Libros

A última das xornadas da Festa dos Libros de Pontevedra arrancará ás 11.30 horas con Xulio Gutiérrez e Isabel Pelayo, membros do Tándem Seceda, presentando, xunto coa artista e narradora Bea Campos, a colección Quen son? Crías de animais, de Kalandraka Editora. Posteriormente, e entre outras moitísimas actividades, os libros mudos serán os protagonistas na mesa redonda que, titulada Sen Palabras: a abraiante narración dos libros mudos, se celebrará ás 12.30 horas e na que participarán as ilustradoras Susana Suniaga e Bea Gregores, a libreira Luz Gallego, Nenuca, e Víctor Mascato Blanco de Triqueta Editora, baixo a moderación da artista plástica Alba Blanco.

Na sesión vespertina, a partires das 18.30 horas, a gaiteira e compositora Cristina Pato conversará con Ana Cabaleiro sobre o seu debut como novelista con No día do seu enterro, mentres que, acto seguido, Carlos Babío Urkidi e Manuel Pérez Lorenzo presentarán, xunto a Ana Miranda, o libro Meirás. Un pazo para el caudillo.

A Festa dos Libros rematará co espectáculo De Campos a Campos (21.30 horas), que contará con Nico Campos e Evaristo Calvo.