Unha festa dará a benvida este mércores aos asistentes ao SonRías Baixas de Bueu

Xa está todo preparado para que Bueu viva o fin de semana máis musical coa celebración do Festival SonRías Baixas, que conmemora o seu vixésimo aniversario. Afianzada como unha das grandes citas musicais do verán galego, este ano adiántase a apertura da zona de acampada a este mesmo mércores coa celebración dunha festa de inauguración no recinto habilitado para recibir aos festivaleiros. O entorno estará ambientado con música, claro está, e varios food trucks para saciar os estómagos e aplacar a espera duns concertos que arrancarán este xoves e se estenderán ata o sábado.

Na presentación onte do SonRías Baixas, Jordi Lauren, quen xunto a Berta Domínguez leva a dirección deste festival, puxo de manifesto a súa aposta por organizar un festival divertido, ao tempo que agradeceu o apoio das institucións durante dúas décadas e poñendo especial atención no talento galego, labor que xa realiza con PlayPlan. Pola súa banda, Jacobo Sutil, director de la Agencia Gallega de las Industrias Culturales (Agadic), recordou que SonRías foi festival pioneiro en introducir o sistema cashless para as transaccións no recinto, mentres que a deputada provincial Nava Castro puxo en valor os vinte anos do festival «traballando a prol da nosa cultura, o noso turismo e o impulso da nosa economía». Ao tempo, salientou «a suma de forzas entre sector público e privado para garantir a calidade, excelencia, recoñecemento e éxito do SonRías».

A importancia do SonRías Baixas en Bueu foi posta de manifesto polo alcalde Félix Juncal ao aludir ao aumento de poboación que ten lugar durante os días do festival, «contribuíndo á economía local e conseguindo colocar a Bueu como un dos puntos de unión cultural musical de Galicia», destacaron dende a organización.

Concertos programados

En canto aos concertos, estes empezarán o 3 de agosto con dúas bandas que regresan ao festival. Por un lado, o punk irónico no exento de crítica social de Lendakaris Muertos e o punk-rock urbano pleno de compromiso social de Boikot. Estarán acompañados por ETS, que chega co seu novo disco Guretzat, os recentemente constituídos 30s40s50s, Samuraï e Santa Salut.

En canto ao venres, o festival terá como cabeza de cartel ao dúo de rap madrileño Natos y Waor, que presentarán os temas do seu cuarto disco, Luna llena. Nesta xornada, ademais, poderá gozarse coa música de La Ganga Calé, Muyayo Rif, Tremenda Jauría, Lia Kali e Queraltz Lahoz. E todos eles sen esquecer a Cool Nenas.

No que corresponde á xornada de clausura, a programación pechará o sábado con La Pegatina, que neste 2023 celebran, ao igual que o festival, dúas décadas en activo co seu 20 Aniversario Tour. De igual modo, Macaco chega ao SonRías Baixas para presentar Vuélame el corazón, o seu novo álbum onde «conviven músicas de raíz, da rumba á cumbia, do folk ao tango, guitarriñas pequenas, moogs e sintes retro, e unhas bases e beats construídos con elementos orgánicos».

Completarase o cartel con Arde Bogotá, Dubioza Kolektiv, LaMontagne & PicoAmperio, María de Juan, Grande Amore ou Ninhodelosrecaos DJ, alias tras o que se agocha Rubén Sierra Jiménez, cantante e guitarrista de La Pegatina. Ortiga e Pili Pampín, así como Lamatumbá, que volven aos escenarios, amenizarán a sesión vermú. E dende a organización destacaron que «aínda queda por desvelar unha actuación sorpresa que terá lugar á unha da madrugada no Escenario Turismo Rías Baixas».