Libros infantís para gozar este Nadal dende Pontevedra

Un libro, non só é un dos regalos máis socorridos nestas datas, senón que é unha forma de gozar destas festas de Nadal. Deste xeito, preguntamos a tres editoriais de Pontevedra polas súas propostas centradas, iso si, nun público infantil e xuvenil.

Neste sentido, Víctor Mascato, de Cumio Editorial, remarca que «sempre tivemos claro que o Nadal, infancia e libros son irmáns que van da man. O consumo que se fai de libros nestas datas é bastante significativo, así que tamén o foron os nosos esforzos para reforzar a nosa oferta de libros para estas datas tan especiais». Deste xeito, a súa primeira recomendación, «e que achega a todo o público familiar moita información sobre estas datas», é Nadalario, «un libro informativo na liña dos que nos últimos Cumio nos ten acostumados onde pon de releve a orixe de todas as tradicións relativas ao Nadal, os seus obxectos navideños, comidas e doces que se consumen no mundo e moitas curiosidades nesta celebración ao redor do mundo».

Outra das súas propostas é Alva e Papá Noel, «unha tradución dun advento que temos producido» desde a editorial. Editado en formato álbum ilustrado «vese como a familia de Alva e Papá Noel vaise preparando xa dende o 1 de decembro ata atoparse na noite de Nadal, pero tamén todo o que acontece polo camiño», engade Mascato.

Dende Cumio, de igual xeito, destacan que para aqueles nenos «máis creativos e que adoran participar nas decoracións da casa e os preparativos» esta dirixido Creactividades de Nadal. Os pequenos a partir de 4 anos poderán atopar neste libro «unha morea de actividades de todo tipo: preparación do Nadal, solsticio de inverno, celebración de Noiteboa o día de Nadal ou a última noite do ano...».

Por último, pero xa da editorial Triqueta, que dispón tamén dunha ampla oferta de libros de Nadal recén traballados, resalta dous títulos. O cantacontos de Nadal, «unha caixa con catro contos en tapa dura e con historias sobre a orixe das panxoliñas mais coñecidas polos pequenos da casa», e, por outra, Sempre Nadal, «todo un clásico traducido xa a máis de dez idiomas ao redor do mundo. Francés, italiano, portugués, grego, coreano ou xaponés, entre outros, e que ven sendo un clásico do Nadal dende hai anos» no que, «dende a ficción, nos conta e nos deixa ver cal é o verdadeiro espírito do Nadal».

Abrir unha xanela

Pola súa banda, Marisa Núñez, editora de OQO, ten claro que «agasallar un álbum ilustrado é abrir unha xanela a outras vivencias, a outro tempo, a outras realidades». A este respecto, remarca que dende esta editorial pontevedresa «tratamos de esquivar as tendencias mercantilistas e propoñemos álbums de sempre, libros que emocionan, lecturas que voltarán en distintos momentos acompañando os procesos da infancia, alimentando o imaxinario e medrando en significado, en cada lectura».

Entre o seu catálogo das últimas novidades propón Algo pasa na casa do lobo, «emocionante, rebelde en certo modo na actitude dos personaxes» onde a intriga e o misterio danse a man «para entender o poder transformador da literatura e gozar dos contos como unha grande aventura». De igual xeito, Marisa Núñez alude a Un banquete fabuloso, onde os lectores terán a oportunidade de coñecer «a coelliña máis intrépida e aventureira do bosque. A sabia e tenaz Peluxiña namora os lectores desde o seu nacemento: emoción e diversión asegurada!»,

E «se procuramos un conto para plantarlle cara aos monstros, Valentina Nunca Calas e o monstro da Media Cara, da narradora galega Charo PIta» é a resposta. «Un álbum para vencer o medo, deixándose levar pola fortaleza da protagonista, porque, ante o medo, convén lembrar o poder da expresión e da palabra», incide, destacando que estas propostas «representan a marca OQO. Libros feitos en Galicia, con imaxes creadas por grandes artistas, que invitan a voltar e gozar da arte e a literatura».

De Dickens a Carle

Kiko da Silva que conmemora o seu 25 aniversario.

E falando de clásicos, hai está Canción de Navidad, de Charles Dickens que Kalandraka presenta nunha edición de auténtico luxo e «renovada cunha portada diferente que realza o espírito do Nadal», obra na que o ilustrador florentino Roberto Innocenti deposita toda a súa arte.

Dende esta editorial, de igual xeito, destaca un novo tomo da serie de Gabrielle Vicente, O Nadal de Ernesto e Celestina, que se suma a outro título de temática navideña desta colección, Ernesto e Celestina perderon a Simeón. Ambos están traducidos por Tamara Andrés.

E tratándose de series non podía faltar outra das lecturas imperdibles destas datas para os máis pequenos, Un, dous, tres, Nadal é, de Nadia Budde.