«O obxectivo dos voluntarios é darse aos demais»

Sen a colaboración de 430 voluntarios non sería posible levar a cabo as máis de 700 actividades da Peregrinación Europea de Jóvenes (PEJ), na que participan unhas 12.000 persoas. David Muñoz é o encargado de xestionar a estes mozos de entre 15 e 35 anos de idade.

—Como afrontan este evento?

—De momento levamos traballando tres días, pero o cansanzo aínda non se nota, iso si, onte estaban bastante nerviosos polo acto de acollida. É certo que a PEJ estaba prevista para o 2021, entón foi un ano máis de preparación, pero tamén é un ano máis no que aumentan as ganas.

—Que tipo de traballos realizan?

—Divídense en grupos de dez persoas, para poder especializarse en determinadas tarefas. Uns encárganse de xestionar os puntos de aloxamento ou o cáterin, mentres que outros están detrás dos talleres, concertos e actividades para controlalas e poder levalas a cabo. Sempre lles digo que eles son os ollos, as mans e sobre todo o sorriso da Peregrinación.

—Con que obxectivo os rapaces se embarcan neste voluntariado?

—Para eles esta experiencia é como un macro campamento, unha semana convivindo con máis de catrocentos mozos e mozas e con actividades. Aínda así, o seu principal obxectivo é darse aos demais, pois é unha forma de chegar á santidade, que ao final para un cristián é unha das metas na súa vida.