Banda Grileira rende tributo á música galega do século XX

Medio cento de músicos subirán este sábado ao escenario do centro sociocultural Mingos de Pita, en Melide, para tributar unha homenaxe ás bandas de música, charangas e murgas que, ao longo do século XX, divulgaron, a través dos seus repertorios, a música tradicional, contribuíndo dese xeito a poñela en valor. Os artistas presentaranse ante o público como Banda Grileira, que, como formación, adopta parcialmente o nome da escola de baile e música tradicionais ao abrigo da que nace a iniciativa. Porque no forno de Herba Grileira se coceu un proxecto no que participan corenta profesores e alumnos desa escola melidense, xunto con dez instrumentistas procedentes das bandas de música de Visantoña, Antas de Ulla e Agolada.

É así —xuntado gaitas, percusións, acordeóns e voces con saxofóns, clarinetes, clarinete baixo, frauta traveseira, trompa, trombón e trompeta, e, puntualmente, violíns— como se consegue artellar «un repertorio variado que mestura música tradicional e sinfónica», explica o músico Miguel Varela, profesor de diferentes disciplinas instrumentais, e tamén de baile, en Herba Grileira. O concerto do sábado no centro cultural de Melide —programado para as oito e media da tarde— é o resultado, ademais dos ensaios, de meses de traballo, elixindo repertorio, arranxando partituras, e estruturando un espectáculo que tamén contén diferentes proxeccións «para situar ao público na época e para darlle a coñecer a historia musical das bandas e a súa influencia na música tradicional», explica Varela, que ve, ao fin, materializada unha idea coa que levaba anos na cabeza e que empezou a fraguar con outros músicos cando en decembro os xuntou a Semana da Música que por esas datas organiza a Coral Polifónica de Melide.