Chaman a participar na manifestación deste domingo ás 12 en Viveiro en favor da sanidade pública

O PSOE chama a toda a cidadanía a participar na manifestación deste domingo en Viveiro en defensa da sanidade pública, convocada pola plataforma SOS Sanidade Pública na Mariña. A protesta sairá ás 12:00 da sede de Cruz Vermella en Viveiro e percorrerá a ponte da Misericordia cara ao centro de saúde.

A alcaldesa de Burela, Carmela López, sinala: «A sanidade pública está en risco, e a situación da Atención Primaria é insostible», advirte López. A rexedora critica que, en lugar de garantir que toda a poboación teña acceso a un médico de familia, «estamos vendo como miles de persoas quedan sen asignación porque non hai profesionais suficientes».

Para a alcaldesa, o problema non radica só na escaseza de médicos, senón tamén nunha xestión deficiente. Advirte que a falta de reposición, a sobrecarga de traballo e a desorganización dos recursos están levando a Atención Primaria ao colapso.

«Hai que centrarse na Primaria, que é a base do sistema, non podemos pensar en grandes hospitais se antes non temos unha Atención Primaria sólida», afirma. A alcaldesa alerta de que se está a investir en tecnoloxía punta nos hospitais de referencia, como o HULA, mentres se descoidan as vilas e pequenas localidades, onde miles de persoas quedan sen médico de familia asignado. Na súa opinión, estase a poñer o foco en infraestruturas en lugar de atender as necesidades básicas da poboación.

Carmela López lembra que o sistema sanitario debe garantir que calquera persoa poida ser atendida por un médico de familia nun prazo de 24 ou 48 horas: «Agora mesmo en Ribadeo hai catro cupos sen médico de familia, en Viveiro a metade non están cubertos, e no Vicedo, en Ourol, en Trabada... está a pasar en toda Galicia», di.

---

---

---