O pintor pontenovés Luis Miranda sorprende na súa primeira exposición con cadros que parecen reais
A PONTENOVA
Aparellador xubilado e artista afeccionado, expón «A arte oculta» no Vello Cárcere de Lugo
14 oct 2024 . Actualizado a las 05:00 h.Hai ó redor de vinte anos que Luis Miranda Redondas (A Pontenova, 1952) estaba a tope de traballo como aparellador cando a súa muller, Elsa, o animou a inscribirse nunhas clases de pintura que daba o pintor mariñán Ángel Carregal, de quen destaca a súa «infinita paciencia e o seu bo facer». Nun primeiro momento, Luis pensou que a sobrecarga laboral que enfrontaba non lle ía permitir acudir ás sesións para aproveitalas como lle gustaría, pero no seu espírito axiña gañaron a partida o neno que sempre gozou argallando cun lapis e un papel, ou o adulto que se entretiña debuxando e se entusiasmaba en canto tiña oportunidade de ver unha exposición ou admirar unha obra de arte. «Empecei sen ningunha expectativa, pero díxenlle ó profesor que me gustaría saber como facían os clásicos para pintar o que pintaban», explica Luis Miranda, que, en plenas festas do San Froilán, acaba de inaugurar en Lugo capital a súa primeira exposición, titulada «A arte oculta». Compóñena corenta óleos e quince debuxos, e poderá visitarse ata o próximo 30 de novembro na primeira planta do centro sociocultural do Vello Cárcere (celas de homes), ó pé da estación de autobuses.
«Como aparellador dominaba as formas, os volumes, as escalas..., pero ó pintar descubrín que a cor é maxia pura»«Gústanme Antonio López, Velázquez, Modesto Trigo..., e nas obras trato de provocar unha sacudida no espectador, ó tempo que trato rodealas de beleza», Luis Miranda Redondas, pintor afeccionado da Pontenova
«Para min, a pintura é un medio de comunicación cun mesmo e co me rodea; o concepto é tan importante como a propia peza e a súa riqueza plástica, por iso trato de que o que fago sexa atractivo e atraínte para quen o mira», comenta un afeccionado que hoxe en día, xa xubilado como aparellador, dedica a diario entre sete de oito horas á pintura na súa casa da Pontenova. Animado pola súa muller e os seus fillos, Luis e Jorge, Miranda continúa afondando na súa paixón artística, e destaca que a pintura vai moito máis aló de coller un pincel, unha paleta e un lenzo. «Dedico moito tempo ó estudo», comenta un home que se sente fascinado pola «maxia pura» das cores. E proba diso é que parte dos seus cadros semellan fotografías. Imaxes cargadas de realidade.