Dobre xornada do Cortegada en terras andaluzas, hoxe en Córdoba e mañá en Málaga
AROUSA
O equipo vilagarcián contaba onte en principio con todos os seus efectivos dispoñibles
15 ene 2022 . Actualizado a las 05:00 h.A primeira hora da mañá de hoxe, a iso das sete, estaba prevista a saída do voo que debe levar o cadro de xogadores e técnicos do Mariscos Antón Cortegada ata Málaga. Empezará así un auténtico maratón. Co tempo xusto para rexistrarse no hotel da cidade andaluza, comer e presentarse en tempo e en forma no pavillón do Milar Córdoba B.F. para disputar desde as seis da tarde o primeiro dos seus dous encontros en menos dun día no sur de España. O domingo ao mediodía o conxunto que adestra Javi Nogueira xogará o choque correspondente á xornada 16, programada para a derradeira fin de semana deste mes, adiantando o duelo co Asisa Alhaurín de la Torre na provincia malagueña.
En principio, a previsión no Cortegada era onte a de viaxar ao completo, coas dez xogadoras coas que conta en nómina neste momento o Mariscos Antón. Hoxe, diante, un Milar Córdoba sexto na clasificación cun balance de 8 vitorias e 5 derrotas, polo 4-8 do cadro vilagarcián. A parella de interiores formada pola húngara Zsofia Licskai e pola senegalesa Aya Traore son, xunto á base Carlota Menéndez, as principais ameazas do cadro cordobés, cun baloncesto moi dinámico e sustentado sobre a capacidade engadida do perigo exterior das súas pívots.
Mañá o Mariscos Antón ten un deses partidos que non se poden perder, fronte a un pechacancelas que tan só foi quen de gañar un partido na Liga.