O Arousa despide a Liga en Viveiro defendendo o factor campo na promoción

A Liga de Tercera R.F.E.F. chega hoxe á súa derradeira xornada. No caso do Arousa, con desprazamento ao campo de Cantarrana para medirse a un Viveiro que pasou de verse cun pé na Preferente na metade do campionato a asinar xunto co Arousa os mellores números da segunda volta tan só por detrás do intratable campión, o Bergantiños.

Desde as cinco da tarde, o conxunto de Luisito xoga coa obriga de puntuar para non depender do que, a partir da mesma hora, faga o que será o seu rival na primeira eliminatoria da fase de ascenso a Segunda R.F.EF. A U.D. Ourense, pola contra, precisa gañarlle no Morrazo a un Alondras que, como o Viveiro, xa non se xoga nada, e agardar a derrota do Arousa.

Máis aló do orgullo de rematar un posto por diante, facelo terceiro, lugar que ata hoxe ocupaba o cadro vilagarcián, ou cuarto, no que o conxunto da cidade das Burgas chega ao desenlace do campionato, supón unha notable diferenza. E é que o terceiro xogará o segundo partido da eliminatoria na súa casa e sabendo que, de rematar o cruce con empate tras os 180 minutos regulamentarios e os 30 dunha hipotética prórroga, clasificaráse matematicamente para a segunda rolda de tres que toca superar para converterse en novo equipo de Segunda R.F.E.F.

Con todo, e sendo os 14 puntos que separan o Arousa do Viveiro un fiel indicador da diferenza de potencial entre ambos os dous equipos, o técnico arlequinado pon xa o seu foco no cruce coa U.D. Ourense ao reservar a Sylla e a Brais Vidal, con catro tarxetas amarelas, para evitar un quinto cartón, sendo que á fase pasan todos os xogadores limpos de amonestacións, pero non de sanción. Iñaki Leonardo, por lesión, e Cotilla, por sanción, son baixa.

---

---

---