Campos, Romero, Álvarez e Lage lideran a potente armada arousá no Europeo de Maratón
AROUSA
Novo padexeiros da comarca aspiran ao podio de once probas en Poznan (Polonia)
25 jul 2024 . Actualizado a las 05:00 h.O Campionato de Europa de Maratón reúne desde hoxe e ata o domingo a elite do piragüismo de maratón do vello continente na cidade polaca de Poznan. Nove padexeiros de tres clubs arousáns integran a sempre potente selección española, encabezada un ano máis polos tres referentes internacionais do Breogán do Grove, Tono Campos, Diego Romero e Tania Álvarez, xunto co tudense das Torres-Romaría Vikinga Iván Alonso.
Serán nove os deportistas de Arousa ou de clubs da comarca os que compitan durante os vindeiros catro días en once probas diferentes. Hoxe, con Candela Romero, do Náutico Pontecesures, sendo a primeira en asaltar o podio, no C1 Júnior Feminino ás 9. Iván Alonso padexa no K1 Sénior Curto desde as 12.30, Íker Rey (As Torres-Romaría Vikinga) no C1 Júnior desde as 14.50 e Diego Romero no C2 Sénior Curto a partir das 16.50.
Íker Rey volverá competir mañá, ás 10.50 no C2 Júnior, co seu compañeiro de club Kevin Longo facéndoo antes, desde as 8.55 da mañá, no C1 Sub 23.
O sábado pode ser o gran día de Arousa no Europeo. Campos e Romero parten ás 10.30 entre os favoritos do C1 e Tania Álvarez e Iván Alonso no K1 de categoría absoluta.
Para o domingo quedarán as finais das embarcacións dobres sénior. Campos e Romero mediránse a Fernando Busto e Diego Miguéns (As Torres-Romaría Vikinga) no C2 a partir das 8.50, con Iván Alonso disputando a súa terceira final en Poznan desde as 14.