A Policía Autonómica identifica o presunto autor do lume de San Vicente do Grove tras confirmar que foi intencionado
AROUSA
Os investigadores sinalan unha fonte de calor compatible cun chisqueiro como o desencadenante do incendio na zona de alto valor ecolóxico
12 sep 2024 . Actualizado a las 16:55 h.O 21 de agosto os veciños do Grove temeron perder unha das zonas de alto valor ecolóxico que fan da localidade un pequeno paraíso buscado por milleiros de turistas cada ano. Só a rápida intervención dos efectivos do Grumir do Grove, apoiados pronto por un camión chegado de Sanxenxo, unha cuadrilla con base en Vilanova e un helicóptero, evitou un mal maior. O balance, 0,3 hectáreas calcinadas nun punto considerado Lugar de Interese Comunitario (LIC) e Zona de Especial Protección de Aves (ZEPA) do espazo da Rede Natura. Tres semanas despois, o Grupo de Investigación de Incendios da Policía Autonómica en colaboración coa Unidade de Investigación de Incendios Forestais da Consellería de Medio Rural esclareceron o suceso.
Unha inspección ocular permitiulles aos axentes determinar o punto de inicio do lume e a intencionalidade do mesmo, ao concluír que fora provocado por unha fonte de calor directa coma un chisqueiro. Os investigadores identificaron a unha persoa como presunta autora, sobre a que pesa a condición de investigada nas dilixencias remitidas ao xulgado de instrución de garda de Cambados.