12 mar 2025 . Actualizado a las 05:00 h.
Recibía o pasado sábado o CX Fontecarmoa Viajes Interrías Sanxenxo o líder da División de Honra das Ligas Galegas de Xadrez en Vilagarcía. Un duelo que se presumía moi complicado co Círculo Ferrolano, pero que virou nunha inesperada derrota, pola contundencia do resultado final: 1,5-4,5.
Andrés Varela, no sexto taboleiro, cunhas táboas, e Julio Suárez, no primeiro, cunha vitoria, foron os únicos dous xogadores locais en puntuar nun marcador que deixa o CXF Viajes Interrías na zona media da clasificación da División de Honra, quinto con 16,5 puntos. A falta de seis das once roldas e co Círculo Ferrolano con 22,5, pelexar polo título semella xa unha quimera para o club vilagarcián.