O Cortegada cae da zona de play-off de ascenso cinco meses despois con Katia Benítez como actriz principal
AROUSA
A aleiro dominicana, descarte o verán pasado tras non gozar apenas de minutos en Vilagarcía, asinou a maior valoración da LF2 en cinco anos, 54, para aupar o B.F. León ao cuarto posto a costa do seu exequipo
01 abr 2025 . Actualizado a las 05:00 h.Cinco meses. Ese é o tempo no que o Mariscos Antón Cortegada pasou instalado ininterrompidamente entre os catro primeiros clasificados do Grupo B da Liga Femenina 2. Isto é, as 18 xornadas que encadeou na zona nobre da táboa, a que dá dereito a disputar a fase de ascenso cos catro mellores do Grupo A na procura dos dous pasaportes para a vindeira edición da Liga Challenge, a categoría de prata do baloncesto feminino español. Unha sobresaínte traxectoria que ameaza con rematar truncada logo da derrota, o pasado sábado en Logroño, na cancha dun líder Bosonit que mantivo por 4 escasos puntos a súa condición de invicto como local.
O 69-65 final relegou o cadro vilagarcián do cuarto ao quinto posto na clasificación tras as vitorias en paralelo dun Romakuruma U.E. Mataró lanzado, consumando o seu oitavo triunfo consecutivo a costa do CB Blanes, 41-63, e do Mipelletymas B.F. León, que saíu vitorioso do seu paso pola cancha do Mondragón, 68-76. Os tres resultados combinados deixan o Mariscos Antón con 15 partidos gañados, un menos co U.E. Mataró e co B.F. León, no peor momento, con tan só tres xornadas máis de Liga por diante.
O adestrador do Cortegada, Álvaro Fernández, salientou onte a dificultade da empresa que o pasado sábado tiñan entre mans as súas pupilas. E con todo, subliña: «Habíamos planteado un partido para pelearlo hasta el final y tuvimos planteamientos muy buenos. Mis jugadoras hicieron todas un partidazo, pero pagamos pequeños detalles durante el partido, como tres tiros libres fallados consecutivamente o también dos tiros bajo el aro». Este sábado, o Cortegada tentará aferrarse á pelexa recibindo o pechacancelas e descendido CB Blanes.
Katia Benítez, de descarte vilagarciano a 54 de valoración co escudo do B.F. León
A temporada pasada, nas filas do Cortegada sobresaía, polo anecdótico da súa participación, unha aleiro dominicana que con 22 anos iniciaba a súa primeira experiencia deportiva lonxe do seu país. Nin Javi Nogueira, primeiro, nin Álvaro Fernández extraeron o potencial que este curso lle está a sacar o técnico do B.F. León, Rafael González. Hai un mes, Katia Benítez lideraba o triunfo leonés sobre o Cortegada, 70-60. O pasado sábado, fronte ao Mondragón, asinou a maior valoración individual na LF2 en cinco anos, 54, con 45 puntos, 10 rebotes e 7 faltas recibidas.