Festa da Ameixa: 3.000 quilos dun dos produtos marisqueiros máis famosos de Galicia
VILAGARCÍA DE AROUSA
A meirande celebración gastronómica de Vilagarcía regresa o domingo a Carril
19 ago 2023 . Actualizado a las 05:00 h.A Festa da Ameixa de Carril volve a Vilagarcía de Arousa na súa vixésimo oitava edición. Logo da parte central das festas de San Roque, a celebración carrilexa volverá a encher a vila de xente nunha homenaxe a un dos mellores produtos gastronómicos da ría de Arousa. A xornada será este domingo, 20 de agosto, a partir das 11.30 horas, coa abertura das caixas e a recepción das autoridades, dos membros da Orde da Ameixa e das confrarías gastronómicas e do viño.
Ás 11.45 horas terá lugar o desfile da orde e das confrarías, acompañado dun pasarrúas cos grupos musicais Xifreiros e Nós de Sobradelo. Xa chegado o mediodía, o actor Víctor Fábregas será o encargado do pregón, dando comezo así á degustación do prato estrela. Desde a organización informan que se espera a preparación duns 3.000 quilos de ameixas, que serán cociñadas á mariñeira.
Desde a Orde da Ameixa as expectativas están en igualar o éxito da última edición, previa á pandemia, na que se venderan un total de 6.500 racións e se espera a asistencia dunhas 1.500 persoas. A degustación continuará durante todo o día e os postos de ameixas non pecharán ata que finalice o evento. O programa continuará ás 12.40 horas co nomeamento dos cabaleiros e as donas da Orde da Ameixa de Carril. Con isto, remata a xornada de mañá e dá comezo a programación de tarde marcada pola música. D'Crooners Band abrirá a sobremesa ás catro e media, cun concerto seguido dun pasarrúas do grupo Ariños de Carril ás seis e media e Broken Peach pechará as actuacións ás 21.30 horas.