Pinocho cumpre en Vilagarcía o seu soño de montar o seu circo

O Circo de Pinocho, o primeiro da historia realizado integramente en galego, chegará ao peirao do Ramal o vindeiro 4 de abril e permanecerá ata o día 13. Trátase dunha innovadora adaptación da historia clásica de Pinocho, quen, nesta ocasión, decide cumprir un novo soño: montar o seu propio circo. O espectáculo combinará a maxia do circo tradicional coa narración teatral, ofrecendo un entretemento para toda a familia. Malabares, acrobacias e actos sorprendentes formarán parte desta proposta, que promete diversión e emoción para grandes e pequenos.

As entradas xa están dispoñibles a través da plataforma ataquilla.com, con prezos que oscilan entre os 10 e os 20 euros, dependendo do día e da localización elixida dentro do recinto. A compañía responsable deste espectáculo é Educateatro Producións, que xa acadou grandes éxitos en Vilagarcía con outras representacións como Carapuchiña Vermella e Os tres porquiños, celebradas no Auditorio Municipal. Nesta ocasión, a historia de Pinocho cobra vida nunha carpa de cen metros cadrados, onde el, Pepiño Grilo, Gepetto e outros personaxes inesquecibles ofrecerán un espectáculo cheo de sorpresas e participación do público.

Segundo explicou Sonia Outón durante a presentación do evento, este espectáculo supón unha oportunidade única para gozar dunha versión renovada do clásico. Ademais, Xandre Vázquez, produtor do espectáculo, detallou que a obra rende homenaxe ao circo tradicional, incorporando números icónicos como a corda frouxa, a suspensión capilar, os malabares e o trapecio. Todo isto estará integrado nunha dramaturxia que acompaña o novo soño de Pinocho, agora convertido en humano: ser o dono do seu propio circo.

Nesta historia, Gepetto deixará a un lado o seu obradoiro de carpinteiro para converterse nun pallaso, a Fada Azul abandonará a súa variña máxica para subirse ao trapecio e outros personaxes vivirán transformacións inesperadas. Ademais, a obra contará coa participación activa do público infantil, que terá a oportunidade de participar.

---

---

---