O Museo do Gravado pecha a edición máis internacional do Atlante co propósito de medrar

BARBANZA




































































A biblioteca ilustrada e a escola taller son os grandes retos
18 sep 2021 . Actualizado a las 18:02 h.Coa entrega dos galardóns, valorados en 14.500 euros, pechouse a doceava edición dos Premios Atlante, que destacou polo seu carácter internacional. Quedou patente nunha cerimonia na que participaron, de xeito virtual, dous dos artistas recoñecidos, que interviñeron desde Polonia e Israel. Ademais de para reivindicar a traxectoria ascendente dun certame que xa é un referente, o acto serviu para reafirmar a intención do Museo do Gravado de Artes de seguir medrando, para o que xa ten varios retos enriba da mesa.
Foi o impulsor do centro, Javier Expósito, o encargado de enumeralos, destacando a necesidade de inaugurar a biblioteca do libro ilustrado, á que se referiu como a mellor de Galicia, e a posta en marcha da escola taller: «Será un paso adiante para a defensa do mundo da gráfica e do gravado en particular».
Ámbolos dous retos tiveron boa acollida por parte do presidente da fundación que xestiona o museo, Manuel Ruiz, que engadiu outros obxectivos, como darlle continuidade á internacionalización da sala co Atlante e coa cesión de fondos, e seguir difundindo as máis de 40.000 obras que atesoura o edificio. Tamén se referiu á necesidade de conmemorar por todo o alto o vixésimo aniversario da apertura dun centro que permite dar a coñecer o municipio de Ribeira e a parroquia de Artes a nivel mundial.
A suma de forzas para que os obxectivos se cumpran quedou, unha vez máis, ratificada, tanto por parte da Xunta, coa presenza de Anxo Lorenzo, secretario xeral de Cultura, como da Deputación, que tivo como representante a Xurxo Couto. Os dous destacaron o importante papel que desempeña o museo tanto na difusión do gravado como na formación de novos artistas.
A sala mira agora cara a vindeira edición do Atlante, co reto de seguir gañando participantes: «O éxito desta edición en tempos tan difíciles debido á pandemia fainos pensar nun futuro moito mellor», aventurou o director do museo, Pastor Rodríguez.
Nuria Pena impúxose cunha simbólica estampa
O premio estrela dos Atlante foi entregado por Ramiro Carregal a Nuria Pena, que explicou a simboloxía que agocha a súa estampa, da que comezou dicindo que é unha imaxe de Galicia. Sinalou que representa unha árbore pequena que tenta medrar rodeada de outras máis grandes. Engadiu que tamén pode aplicarse ao gravado, «unha técnica menor, pero que esperta unha gran paixón e que os grandes artistas fixeron súa».