Os asistentes ao acto de Barbantia en Noia cantaron ao ritmo do artista durante a presentación do seu traballo literario
23 mar 2024 . Actualizado a las 18:44 h.Non foi un acto literario convencional, pero si unha viaxe musical e poética na que os asistentes sentíronse artistas guiados polo incombustible Xurxo Souto. No acto mensual de Barbantia, o escritor e docente desembarcou en Noia para defender a incorporación da música ao mundo académico e para poñer de manifesto que a poesía naceu para ser cantada. Implicando ao público en todo momento, Xurxo Souto falou do seu último traballo literario, titulado Somos un pobo de artistas: o método Luísa Villalta.
A Luísa Villalta dedícaselle este ano o Día das Letras Galegas e Xurxo Souto, que foi amigo seu, afirma que se fala dela como poeta, narradora ou autora dramática, esquecendo que publicou un libro no que afirma que «música e poesía son o mesmo, polo menos na súa orixe».
Xurxo Souto foi un orador que cantou e contou, poñendo de manifesto o pegada que á pel está a música. Acompañándoo na mesa estaban o historiador e representante de Barbantia Xerardo Agrafoxo, o concelleiro de Cultura de Noia, José Pérez, e Abraham Romo, neto do fundador dos Tamara Prudencio Romo. Sobre este último falou Xurxo Souto, como tamén o fixo sobre Pucho Boedo, do que puxo un vídeo dunha das súas últimas actuacións explicando a letra do tema O vello e o sapo.
Os Tamara
Baixo a batuta de Xurxo Souto, o público acabou entoando máis dunha ducia de cancións, dende temas de Os Tamara de O Satélites ata cantigas populares. Incluso melodías que no seu día foron propias de sectores profesionais, como o das traballadoras da conserva.
Cun ritmo trepidante, Souto relatou anécdotas sobre formas de cantar do pasado e tivo referencias para diversos artistas, como Mercedes Peón.
O certo é que a música estivo presente na cita literaria de moitas maneiras, posto que os alumnos do Conservatorio Municipal de Noia Ariana Gil, Álex González e Candela Senlle, así como o docente Adolfo Carreira, interpretaron a violín as pezas El carnaval de Venecia, de Nicolo Paganini, e Por una cabeza, de Carlos Gardel.
Agrafoxo fixo unha introdución bibliográfica ao autor, dando unhas pinceladas sobre o libro. Pola súa banda, Abraham Romo falou do seu avó, repasando a súa figura como compositor e músico e tamén a súa relación con poetas como Celso Emilio Ferreiro.
O encargado de pechar un acto que resultou trepidante dende o principio foi José Pérez, quen destacou a aproximación á música feita por Xurxo Souto, ao tempo que agradeceu a presenza de Barbantia e a realización do acto na vila de Noia.