Rubén López, adestrador da selección galega sub-16 de fútbol: «Galicia deu un paso adiante. É un bo momento»

Rubén López (A Pobra, 1979) leva tempo formando parte dos corpos técnicos das seleccións galegas masculinas de fútbol en categorías inferiores. Estivo na sub-14 e na sub-16, da cal agora colleu as rendas para sentarse no banco como máximo responsable do equipo. Por riba xa só está a absoluta. «A Federación contactou comigo e trasladoume a súa confianza. É un exercicio de continuidade, o que reforza o traballo feito e que vamos no bo camiño», destaca o barbancés. Asegura que esta nova etapa é «ilusionante» e que ademais de supoñer unha maior carga de traballo tamén supón «ter contacto cos clubs galegos e con deportistas de alto nivel».

Esta é unha das súas tarefas nun cargo que implica pasar por diferentes fases. «Está a competición, as concentracións, os adestramentos e a captación, polo que tes que ver o máximo fútbol posible. Hai que desprazarse e ver a evolución constante dos xogadores», apunta López nunha conversa que se producía pouco antes de que puxera rumbo a Lugo para, precisamente, asistir a un encontro.

O seu debut oficial como seleccionador galego sub-16 terá lugar o 1 de novembro, coa disputa da primeira fase do Campionato Nacional de Seleccións Autonómicas, na que Galicia se terá que enfrontar a Madrid e Canarias: «Este ano chega un pouco cedo e hai que estar mañá e tarde facendo scouting».

López xa sabe o que é participar neste torneo e que o seu equipo faga un bo papel. Os mellores accederán á fase ouro e o resto á prata. Entre os primeiros sairán os conxuntos que disputarán o título. «No meu primeiro ano chegamos á fase final, que non se xogou pola pandemia. Logo fomos campións de España, noutra ocasión acadamos as semifinais e outro ano gañamos a fase prata», sinala o pobrense.

Maior formación

Os éxitos chegan, explica Rubén López, porque «Galicia deu un paso adiante en todos os niveis». Un deles é a maior formación dos adestradores, que acaba repercutindo no traballo diario e «sube o nivel das competicións e dos xogadores. É un bo momento e tamén se ve individualmente nos futbolistas e, por iso, a día de hoxe Galicia aporta un número importante de futbolistas á selección nacional desde sub-15 ata sub-21».

Pero a isto non se chega dun día para outro, «é un traballo de tempo, unha aposta polo fútbol de base na que hai moita implicación, tanto a nivel masculino como feminino. Estamos moi contentos de como está a evolucionar o deporte. Cada vez hai mellores adestradores, mellores condicións e os clubs están máis preparados. Así, os rapaces teñen adestramentos de calidade e iso é fundamental», comenta López.

Aínda que a súa profesión é a de técnico de deportes no Concello da Pobra, o fútbol é unha parte moi importante da súa vida. Alá polo ano 2005 comezou a adestrar nas categorías inferiores do Puebla para logo pasar ao primeiro equipo. Despois puxo rumbo a Boiro, onde estivo na base, logrando ascensos a Liga Nacional, e tamén dirixiu nun par de ocasións aos boiristas en Terceira. Nos últimos anos compaxinou as súas funcións no corpos técnicos das seleccións galegas con ser segundo adestrador en equipos como o Alondras ou, a pasada campaña, o Estradense.

Agora, unicamente está dirixindo á selección galega sub-16 masculina porque o tempo tampouco da para máis: «Estou entregado a este posto. Cada semana vamos probando a novos xogadores e buscando a nosa liña de identidade. Buscamos futbolistas de cara ao futuro, porque con 16 anos teñen que seguir crecendo e dando pasos firmes».

---

---

---