BNG e a familia de Paco do Martelo rememoraron a revolta veciñal de 1916
12 oct 2023 . Actualizado a las 18:15 h.Os veciños de Porto do Son manteñen viva a lembranza aos mártires de Nebra, catro mulleres labregas e un home asasinados o 12 de outubro de 1916 por negarse a pagar un tributo abusivo e que deixou outros moitos feridos. A ponte de Cans acolleu onte as tradicionais homenaxes: a impulsada hai máis de dúas décadas por Paco do Martelo, da que tras o seu falecemento recolleu a testemuña o seu fillo, e a que leva a cabo o BNG.
Pola mañá tivo lugar a do BNG, no que a deputada pola Coruña Mercedes Queixas definiu como «un exemplo de dignidade e de mobilización de quen non aceptou a submisión ante o abuso de poder». Manifestou que «forma parte da memoria colectiva que nos pertence como pobo».
Ao mesmo tempo, falou doutros feitos máis recentes, como a revolta das labregas das Encrobas o das marismas de Baldaio.
Queixas tivo tamén palabras de lembranza para a que fora concelleira sonense, Ánxela Franco, «admirada e estrañada». No acto houbo representantes de varios municipios e non faltou o voceiro do BNG sonense, Balbino González.
A familia de Paco do Martelo
Pola tarde foron a viúva de Paco do Martelo, Teresa Pouso, e o seu fillo, José Antonio Calo, os que acudiron á ponte de Cans.
Xunto á placa que lembra o acontecido, Teresa Pouso depositou un ramo de flores. Eles recolleron a testemuña de Paco do Martelo na homenaxe aos mártires de Nebra.