A comunidade educativa será a principal protagonista das FestiLetras nos vindeiros días. Mañá mesmo ponse en marcha o programa de actividades polas escolas do municipio. Pepe Maravillas ofrecerá aos rapaces un obradoiro de música tradicional adaptado á idade dos nenos. Empezará polos máis pequeniños con visitas ás escolas do Colexio Rural Agrupado Nosa Señora do Faro. Tamara Lema e Silvia Losada darán a coñecer dun xeito divertido as figuras de Pondal e Rosalía, en tanto que Ana María Fernández e Xoán Babarro poñerán en escena A longa viaxe de Carambeliña polar e A tea de araña que todo o apaña. Para os máis mayores engadiranse outras representacións. A proposta será similar mesmo para os rapaces do instituto.
As campás
Para os docentes están reservadas varias tardes. A Fundación Eduardo Pondal organizou xornadas formativas sobre As campás na literatura. O primeiro día participarán Félix Neira, que falará sobre Pondal, e Miguel Anxo Mato Fondo, que fará un análise do poema A Campana de Anllóns. Diana Varela Puñal ofrecerá un recital poético e Miguel Mato Fondo presentará dous libros. A música correrá a cargo de César Morán.
As actividades formativas seguirán o mércores coa presencia de Xosé Pumar Gándara. Rosalía Fernández e Serxio Moreira presentarán o libro Atonía, coa presenza de pintores de toda a Costa da Morte.