A cantante Pili Pampín aténdenos desde a perruquería. Ponse guapa para a xira, pero di que alí «non se fan milagres, non é coma Lourdes, pero inténtase», bromea. «Sempre que vou a un concerto paso antes pola perruquería, fixo. Vou á de toda a vida». Está feliz de percorrer a Costa da Morte este ano. Di que lle encantan a zona e o público, por iso vén sempre unhas horas antes para facer unha visita, como na Feira das Cereixas de Paiosaco. «Non comín cereixas porque facía frío e marchei para a casa poñer as pantuflas e o pixama de felpa. Algo imperdoable». Ela as vacacións tenas sempre en outubro, «pero este ano a comuñón da nena xa é un gasto enorme».
-Comida e bebida.
-Auguiña e melón con xamón.
-Praia favorita.
-A de Mañóns, en Boiro, á que aproveito ir media horiña cando me dá tempo.
-Non sae da casa sen...
-O móbil e a carteira (ri).
-O mellor e o peor do día.
-O peor é volver á casa despois dunha gala, porque son quilómetros e quilómetros. O mellor, estar no escenario.
-¿Romarías ou verbenas?
-As verbenas, por suposto.
-Gasta pista con...
-El polvorete.
-No verán infórmase con...
-A Internet e o xornal.
-A viaxe deste verán.
-Non sei se poderei, pero se podo, a Tenerife.