Un alumno do CEIP Labarta Pose de Baio gaña o 21.º certame Contos de Nadal

A 21.ª edición do certame literario Contos de Nadal de La Voz de Galicia xa ten gañador: Antonio Candal Rey. É alumno de cuarto de primaria do colexio Labarta Pose de Baio, e o que isto vén a significar é que este centro educativo volve levar de novo, coma no 2023, o primeiro posto do podio que recolle os dez relatos máis puntuados polo xurado. Daquela volta, 20.ª edición, a gañadora fora Sara Fernández Santos, unha pequena dada á boa pluma, e para mostra o feito de que este 2024 conqueriu un novo galardón, o sétimo premio. A ledicia non queda aí para o Labarta Pose, porque este será o terceiro ano consecutivo encabezando o concurso: no 2022 gañárao Mariña Vázquez Espasandín. En toda a historia do certame, creado no 2001, tres veces foi o primeiro posto para o centro educativo baiés, e as tres seguidas.

Ademais de Antonio e de Sara, ten o Labarta Pose outros dous alumnos premiados nos Contos de Nadal 2024: debuta Olivia Álvarez Domínguez e repite tamén Laura Cerviño Fuentes, cun noveno posto que chega logo do séptimo acadado no ano 2023.

O burriño que quería ser un reno de Papá Noel é a historia presentada polo gañador desta edición, un texto seleccionado por todos os integrantes do equipo valorador, obtendo así a maior puntuación. «Nacera nunha granxa rica, cunha corte para el só, un montón de comida e cepillado diario. Era un burro feliz», contemplan sobre o burro Blas unhas cantas liñas deste conto que, como os outro nove seleccionados polo xurado, será publicado o vindeiro sábado nas páxinas de La Voz. Ese día, 21 de decembro, será a entrega de premios, ás 12.00 na Casa da Cultura de Vimianzo, con presenza de autoridades, comunidades educativas e familias.

Bergantiños, Soneira e Fisterra

Alba García Suárez, do colexio A Cristina de Carballo; e Olivia Álvarez, do Labarta Pose, seguen a Antonio nese podio como segunda e terceira premiada, respectivamente. Estivo esta 21.ª edición repartida, pois o cuarto premio viaxou ata o colexio Manuela Rial Mouzo de Cee, onde estuda Vera Martínez Figueroa, e o quinto chegou ata o colexio Nosa Señora do Carme de Fisterra, que ten nas súas aulas a Edurne Trillo Fábregas. Mateo Fernández, de As Revoltas de Cabana; Sara Fernández, do Labarta Pose; Roi Barcelona, do Manuela Rial; Laura Cerviño, do Labarta; e Sofía Domínguez, de novo do Manuela Rial, conqueriron o sexto, sétimo, oitavo, noveno e décimo posto, respectivamente. Quero isto dicir que polo escenario da Casa da Cultura de Vimianzo pasarán o sábado a recoller galardóns estudantes de Bergantiños, Soneira e Fisterra.

Contos de Nadal de La Voz de Galicia é un certame que conta co patrocinio de EDP Renewables e Fundación EDP. Ademais de fomentar a creatividade literaria nesta época de Nadal, o concurso procura espertar nos nenos a observación do seu entorno máis inmediato, a Costa da Morte nas súas múltiples dimensións, sendo capaces de levar todo iso ao papel en lingua galega. Historia, patrimonio material e inmaterial, paisaxe, sabedoría popular... A convocatoria está dirixida ao segundo ciclo de primaria de todos os centros educativos desta comarca, e pese ás súas idades temperás [terceiro e cuarto curso], os textos revelan unha capacidade inmensa de empaparse do que sucede ao redor. Así, moitos dos relatos achegados a este concurso, máis dun cento, facían alusión ás vítimas da dina de Valencia, mais tamén á situación de guerras, á diversidade do mundo, á actual era tecnolóxica ou ao papel dos avós nas familias. Moitos dos contos, de feito, ligaban directamente o Nadal a estas figuras, e á súa lembranza.

Non tivo o xurado un papel fácil, mais si imprescindible para que o certame siga avanzando. Estivo integrado este 2024 polos docentes Ricardo Vigueret (Baio), María Paz Rodríguez (Vimianzo) e Luís García (Coristanco), así como polo delegado de La Voz de Galicia en Carballo, Xosé Ameixeiras Lavandeira, e a xornalista Patricia Blanco.

---

---

---