Foi publicado Balón a Corveiro, de Gabriel, Bebeto, Riveiro, a biblia do fútbol fisterrán. Estiven preto no seu proceso de elaboración, asistín feliz á súa masiva presentación no Mercado Cultural de Fisterra. Fun testemuña de que os libros que recollen feitos da historia local concitan o interese da veciñanza. Fan un servizo público, son pedagóxicos. Congregan sen ser diante dunha pantalla, xeran oportunidade de reencontros, provocan apertas de gol, o sorriso cos ollos, a lembranza emocionada, o recordo dos que xa non están mais seguen moi presentes.
Tinín de Matías, Gelucho, o Neghro, Traba e Castreje estiveron porque se lles nomeou con maiúsculas. Alí había varias xeracións de futbolistas: os Miculita, Manín ou José López, a quen vin xogar xunto cos xogadores que agora defenden a cor verdinegra característica.
O labor social que achega Gabriel á súa localidade con diversas iniciativas e de balde coma este libro benéfico, que valor ten? Enorme. Non hai cartos que paguen este capital social que logrou amorar este benquerido fisterrán. Persoas así, auténticos animadores socioculturais da comunidade, valóraselles máis cando desaparecen. Mais non é o caso de Bebeto, un crack veciñal que o pasado sábado sentiu a querenza dos siareiros, o recoñecemento de homes e de mulleres, de vellos e novos alí congregados, dos locais e dos visitantes, asistindo emocionados a un acto cívico e cultural, pois a obra en cuestión amosa cen anos da vida desta localidade fin da terra.
O fútbol de base leva moreas de décadas exercitando corpos, cohesionando socialmente, dando identidade, vertebrando a Costa da Morte, acougando ansiedades e dando folgos para abordar as xornadas de labor con garantías ata o seguinte partido. E Gabriel agora, como antes fixeron os Lema en Baio, Moncho de Lourdes en Esteiro, Diego Mayo na Ría de Noia e Muros, Héctor Pose e Luís Porto en Malpica, Xan Fraga en Carballo, Xavier Maceiras en Arteixo, etcétera, era consciente da valía destas recompilacións en forma de libro. Levoulle anos, acincáronlle algúns coma Ernesto Insua, home de intelixencia comunitaria. E velaí este ledo alumeamento. Un álbum comunitario, a acta dun vivir intenso e dun convivir compartido de intres de épica e paixón. Un libro necesario.