Na súa historia, o festival carballés acolleu máis de 350 formacións e artistas con nomes tan salientables no panorama galego, nacional e internacional coma Blanca Portillo, Carmen Machi, Leo Bassi, Ron Lalá, Titziana, Kamikaze Producciones, Compañía do Chapitô uo Lola Herrera, entre outros.
06 mar 2025 . Actualizado a las 05:00 h.O Consello da Cultura Galega vén de publicar o seu barómetro anual e o FIOT (Festival Internacional Outono de Teatro de Carballo) ocupa o posto 31 da clasificación global como a terceira actividade de artes escénicas mellor valorada e o primeiro festival de teatro de Galicia. Deste xeito, o FIOT segue a sumar recoñecementos tras ser distinguido no mes de xaneiro como o cuarto mellor proxecto cultural galego do 2024 polo Observatorio de la Cultura, da Fundación Contemporánea.
Por sectores, as artes escénicas sitúanse no quinto lugar por detrás das institucións da cultura e acadan un 13,8 % das mencións totais. Xosé Antonio Touriñán e Carlos Blanco, máis o seu espectáculo Somos criminais e punto final son os máis citados. O FIOT de Carballo é o seguinte, cun 1,1 %.
Dende o propio festival aseguran que tanto pola súa traxectoria como pola calidade da programación e a variedade das propostas están entre os máis importantes de Galicia e é todo un referente durante o outono, cun mes completo de programación, máis de 35 espectáculos e ducias de actividades paralelas.
Está organizado dende hai 33 anos pola Asociación Cultural Telón e Aparte e dá a coñecer en Carballo o traballo de compañías de referencia e tamén de creadores emerxentes, máis especialmente busca atraer novos públicos.
Na súa historia acolleu máis de 350 formacións e artistas con nomes tan salientables no panorama galego, nacional e internacional coma Blanca Portillo, Carmen Machi, Leo Bassi, Ron Lalá, Titziana, Kamikaze Producciones, Compañía do Chapitô uo Lola Herrera, entre outros.
Ao longo da súa traxectoria tivo diversos recoñecementos como o Premio Galego do Ano, no 2018, cando acadou tamén o da Cultura Galega no ámbito das artes escénicas.