Moitos non saberán o que é Only Fans, aínda que empeza a ser difícil non sabelo. Non teño o gusto de contar con experiencia nesta plataforma dixital coñecida polo consumo de fotos de contido sexual, pero o certo é que está á orde do día. Xa hai xente da Costa da Morte que vive diso. E esta información é coñecida por moitos xa que son as propias persoas cos seus perfís nesta aplicación as que se encargan de facela pública para chegar a un maior público. Soben contido privado baixo previo pago tanto homes como mulleres, aínda que parece que son máis estas últimas mentres que no outro lado predominan os varóns.
Fálase do moi valoradas que están as fotos dos pés. Vaia por diante que cada un é libre de facer co seu corpo o que quere sempre que sexa por decisión propia. Agora ben, diría que iniciativas como esta denigran máis aínda ás mulleres (tamén aos homes, claro), por non falar de que poden incentivar outras malas prácticas. Por tanto, considero que é unha actividade que ten máis riscos que beneficios. Porén, o tema está de plena actualidade, e dito isto, vese como algo normal, incluso, por moitos. De feito, a varias das persoas que están detrás destas contas incluso se lles chama influencers. Xa vai haber que ensinalo nas escolas e todo... —ironía—. De feito, hai moitos famosos que presumen de vivir disto.
Estes días aparecía a nova de que unha moza ucraína, modelo de Only Fans, foi atopada na rúa, en Dubai, con importantes danos no seu corpo. A versión oficial di que caeu dende unha obra, pero a familia parece ser que desconfía. Maria Kovalchuk comunicara que ía a unha festa privada antes de desaparecer.