A innovación dende o colexio: unha máquina recicladora que funciona cunha bicicleta

A mediados dos 80, Charo Medina e Armando Barbazán puxeron en marcha en Santiago un colexio que antes de ter educación Infantil, Primaria e Secundaria, tiña un ciclo formativo de protésico dental. De aí o nome, Santa Apolonia, patroa dos dentistas. Non obstante, a identidade do centro quixérona dirixir dende o inicio a unha relación moi estreita ca natureza.

Nun primeiro momento foi a hípica ese fío de conexión, pois Armando era amante desta disciplina. Pero a evolución e o crecemento do colexio converteríano despois nun dos referentes do programa Voz Natura. «Co paso dos anos, comprobamos como na práctica é beneficioso para os rapaces que a educación teña relación co entorno onde se desenvolve», explica Jesús Couso, Kechu, mestre de infantil e coordinador dos proxectos que se fan ao abeiro de Voz Natura.

«Temos unha granxa escola na zona de Negreira, e no propio centro temos cabalos, galiñas, gatos e cans. Temos un invernadoiro tamén e estes días aínda estivemos botando patacas. Son proxectos doutros anos que imos mantendo, tamén plantacións de árbores», comenta o docente.

Unha das últimas ideas deste centro foi a creación dunha máquina de reciclaxe: «Démonos conta de que se nos rompían continuamente as palas de plástico, así que buscamos a maneira de crealas nós», indica Kechu. Entre os alumnos de Infantil, Primaria e Secundaria foron xurdindo ideas e propuxéronse fabricar unha especie de máquina recicladora de plástico, pois ese debería ser o primeiro paso. Logo de moito investigar, atoparon a solución: unha trituradora que funciona a través dunha bicicleta, cun sistema de cadeas que se pon en marcha cando alguén pedalea. Xa leva un ano funcionando, mentres agora intentan crear uns moldes para reutilizar ese plástico.

---

---

---