![](https://img.lavdg.com/sc/fotflxnWTEvT0cgcDG6_OnktDBY=/480x/2023/07/08/00121688853362348692775/Foto/C08L3295.jpg)
Unhas coplas de Roberto Traba
06 jul 2024 . Actualizado a las 05:00 h.Estamos en pleno verán,
moitos xa están bronceados,
a sardiña molla o pan
e os estudantes folgados
xa están artellando un plan
para andar de festa en festa
dende a noite ata a mañán.
Ca resaca do San Xoán
quedaron un pouco afumados,
pero tras unha semán
nos sofás escarallados,
xa están pensando outra vez
en andar de brincadeira
por aldeas e poboados,
muelles, rúas, carballeiras,
praias, castelos e prados.
A Galicia xa chegou
o seu máis famoso deporte
pois dende o sur ata o leste
e dende o oeste ata o norte
está todo o mundo de festa
porque temos a gran sorte
que do Salnés ao Cebreiro,
e de Lugo a Costa da Morte,
andan tocando gaiteiros
e orquestras de moito porte
para que as mozas se alegren
e os mozos se reconforten.
Máis como non teño espazo
para ir aquí nomeando
todas esas romarías
que están por aí festexando,
permitide que vos diga,
antes de ir rematando
que o sábado os de Fisterra
andaremos celebrando
un entroido de verán
que polo que están contando
serache internacional,
pois moitos xa están chegando.
Así que pois señoriñas,
e así que pois, meus señores:
Vinde todos a Fisterra,
a terra dos meus amores
que haberá festa rachada,
boa música e sabores
de entroidos entre licores
entre alegres batucadas
de trompetas e tambores.
Non se pode pedir máis,
así que quentade os motores
pois xa se escoitan rumores
de que se están disfrazando
alumnos de profesores,
xubilados de camareiros,
e bedeis de directores,
pero tamén as sardiñas
e os paxariños cantores
que din que teñen pensado
ir vestidos de mil cores,
e as gaivotas de fanecas
e de carballos as flores
e os polbos de lumbrigantes
e de actrices os actores.