Rematada esta edición invernal, a organización valora positivamente os resultados
11 dic 2024 . Actualizado a las 05:00 h.Un festival no que o público se sentiu acollido e «como se estivese en familia».
Rematou unha edición invernal que supuxo o retorno do Comarea, e a organización desta cita muxiá valorou positivamente os resultados acadados e o volume de afluencia de público. «Á xente que participou gustoulle moito», aseguran.
Comezou este Comarea os días 3 e 4 de decembro cun taller de percusión doméstica no que se amosou a facer ritmos con «cousas que temos na casa como culleres, vasos, cunchas, caldeiros ou vasoiras», refiren os promotores. Sumáronse persoas de diferentes idades e creouse un ambiente, din, «moi interesante».
O 5, un faladoiro cultural no que se abordaron cuestións de «gran importancia» para a programación cultural dunha pequena vila como Muxía logrou reunir a preto de medio cento de asistentes, que ao rematar gozaron dun petisco e do concerto de Sofía Espiñeira e de Bonita & Sabrosa no Bar Porto.
Continuou a programación o venres 6 cunha limpeza e cun taller creativo con lixo mariño na praia do Lago, así como coa degustación dunha paella e cos ritmos de Pamela Rodríguez. Esa tarde-noite comezaron tamén, no cámping LagoMar, os concertos de pago, nos que se xerou un «ambiente moi san, con xente con ganas de bailar e entregada ao desfeute», apunta a organización desta cita.
O 7, o bar Plaia das Lanchas acolleu un deses momentos que quedan para o recordo: o atrevemento da pequena muxiá Valentina, que coa súa pandeireta animouse a interpretar un tema con Pulpiño Viascón durante o seu concerto.
O broche de honra a esta edición correspondeulle a Family Folks, nas Baleas.