A Deputación apoia o labor social dos concellos e de centos de asociacións
A CORUÑA
Financia 400.000 horas de axuda no fogar e contrata a 180 profesionais
08 feb 2025 . Actualizado a las 12:08 h.A Deputación da Coruña reforzou nos últimos anos o seu compromiso cos servizos sociais, converténdose «nun piar esencial» para mellorar a calidade de vida da cidadanía. Este ano, cun orzamento de 33,6 millóns de euros para a área social, esta Administración aposta por programas que garanten unha atención máis ampla, profesional e eficiente, cunha inversión sostida que permite fortalecer tanto os recursos dos concellos como apoiar a centos de entidades sociais que desenvolven un labor fundamental apoiando aos colectivos máis vulnerables.
A Deputación vén de aprobar un investimento de 9,5 millóns de euros para soster os servizos sociais dos concellos de menos de 20.000 habitantes. Con cargo a estes fondos do Plan de Servizos Sociais Comunitarios, os municipios coruñeses contratan a 180 profesionais que garanten unha atención de proximidade e de calidade, incluso nos municipios máis pequenos da provincia.
Este apoio económico permite tamén aos concellos financiar preto de 400.000 horas de Servizo de Axuda no Fogar (SAF), un recurso esencial para moitas persoas maiores ou dependentes, así como axudar aos concellos a mellorar as condicións laborais das coidadoras que traballan neste servizo, xa que a achega da Deputación pasa de 12 a 14 euros por hora, incrementado en 800.000 euros o orzamento do ano pasado.
Por outra banda, o organismo provincial entende que o traballo das entidades sociais é chave para atender a persoas en situación de vulnerabilidade. Por iso, este ano destina 4,5 millóns de euros a subvencións para apoiar o traballo de 273 agrupacións, co obxectivo de que os seus servizos cheguen ao maior número de persoas posible.
«As entidades que traballan na provincia da Coruña realizan un labor fundamental coas persoas que máis apoio necesitan. Un traballo que mellora a vida de miles de veciños e as súas familias que desde a Deputación queremos seguir apoiando e reforzando con estas liñas de axudas», afirmou o presidente, Valentín González Formoso.
A deputada de Política Social, Mar García Vidal, detallou que, entre os programas e servizos cofinanciados pola Deputación da Coruña en todo o territorio provincial «hai terapias de rehabilitación, programas de atención psicosocial e prevención de condutas aditivas, respiro familiar e coidado de persoas maiores ou con discapacidade, transporte adaptado ou integración laboral que benefician a miles de persoas e lles axudan a mellorar a súa calidade da vida».
Teleasistencia
Outro dos servizos fundamentais da área social é a teleasistencia, na que inviste 1.372.000 euros este ano. Actualmente, máis de 4.200 persoas maiores da provincia son usuarias activas do botonciño da Deputación, un dispositivo que os acompaña durante as 24 horas do día, os 365 días do ano, e que garante a seguridade e a asistencia inmediata para as persoas maiores que viven soas e ofrece unha gran tranquilidade ás súas familias. Saben que só con premer o botón, sempre hai unha persoa pendente deles ao outro lado da liña.
Por outra banda, a soidade non desexada é un problema crecente na sociedade actual, especialmente entre as persoas maiores que viven no ámbito rural. Por iso, a Deputación da Coruña lanza un novo programa de envellecemento activo e loita contra a soidade, cun investimento de 295.000 euros.
As Pontes, Rianxo e Ordes un novo modelo residencial público para maiores
A Deputación da Coruña leva tempo traballando no deseño dun novo modelo de residencias públicas para maiores, baseado en centros máis próximos, de menor tamaño, con atención personalizada e integración interxeneracional.
«É un modelo inspirado no que xa se está aplicando con éxito nos países do norte de Europa, como Dinamarca ou Suecia, que aposta por centros pequenos, nun entorno máis humano e comunitario, onde as persoas residentes poidan manter a súa autonomía e conexión coa súa contorna, evitando o desarraigo cando están encerrados en macrocomplexos masificados e pouco humanizados, ou teñen que pagar residencias privadas con tarifas moi caras para as familias», explicou o presidente da Deputación, Valentín González Formoso.
O municipio de As Pontes será o primeiro da provincia coruñesa no que se testará este novo modelo residencial público, que tamén contará con centros pilotos en Rianxo e Ordes destinados a persoas maiores de cada bisbarra.
Sari Alabau (Asfedro): «A Deputación é moi sensible coa lacra de drogadicción»
A Asociación Ferrolana de Drogodependencias (Asfedro) está a piques de cumprir 40 anos, desde a súa fundación en 1985, para loitar contra a lacra da heroína. «Hoxe atendemos a unhas 60 persoas a través das 22 prazas que dispoñemos na comunidade terapéutica», sinala Sari Alabau, presidenta desta entidade que recibe periodicamente o apoio da Deputación da Coruña. «Todos os anos nos aporta unha axuda para inversión, algo que non nos permiten subvencións doutras Administracións, que teñen que ir para gasto corrente», sinala Alabau. Deste xeito puideron mellorar o illamento cunha nova cuberta. Pero este 2025 comezou con grandes novas para Asfredo. «No pleno provincial de xaneiro acaban de aprobar un convenio de case 300.000 euros para proxectos de reestruturación, temos moito que agradecerlle á Deputación, é moi sensible con esta lacra da drogadicción», conclúe a presidenta de Asfedro.
Rita González (Asperga): «Gracias a esta Administración tenemos un local en propiedad»
Asperga é a Asociación do Espectro Autista en Galicia, que estes días celebra unha nova extraordinaria. Despois de case 20 anos alugando a súa sede principal da Coruña, a Deputación acaba de aportarlle 300.000 euros para facerse cun amplo local e varios pisos anexos na avenida de Oza. «Para asociaciones de este tipo lo que hemos conseguido en los últimos años es muy importante, pero esto del nuevo local ha sido la guinda del pastel», celebra Rita González, presidenta de Asperga, que conta con 470 socios na provincia da Coruña (se ben a entidade abrangue toda Galicia). Ademais da importante achega provincial, González destaca a axilidade por parte da Deputación nos trámites burocráticos. «Tuvimos una reunión con el presidente y su equipo en el 2024 y en poco tiempo nos han facilitado los fondos para conseguir un local que irá ligado al crecimiento de nuestra asociación», agradece a responsable de Asperga.