Pide completar un relevo xeracional que continúe a empresa que comezou nos anos 70 «co mesmo espírito co que se fundou»
18 abr 2022 . Actualizado a las 20:18 h.Se unha persoa aparecese de súpeto en Galicia, ou en Santiago, e só tivese dúas horas para saber o que é Galicia, a recomendación sería visitar o Museo do Pobo Galego. A chanza do conselleiro de Cultura, Román Rodríguez, precedía o anuncio do presidente do seu padroado, Justo Beramendi: deixa o cargo en maio.
«Este é o último convenio que vou asinar coa consellería», anunciaba Beramendi en referencia ao acordo de investimento dun total de 431.000 euros para a creación de dúas salas sobre a época medieval e moderna de Galicia para progresivamente ir completando a liña histórica de Galicia. «Eu xa me retiro, xa vai sendo hora», dicía, antes de lembrar que o Museo do Pobo Galego - premio Fernández Latorre no 2019- é unha empresa colectiva con contribuíntes tanto institucionais como individuais.
«A Xunta asumiu aproximadamente o 60 % do orzamento do museo, tanto para gastos correntes como para investimentos», xa sexa deconsolidación de edificios como de creación de novas salas. Beramendi iniciaba así unha intervención na que lembrou que o crecemento do museo foi intermitente e que agora está nun momento de salto e se cadra do máis importante da súa historia. «Agardo que o meu sucesor ou sucesora poida seguir agradecendo este apoio á Xunta», remarcaba o presidente do padroado.
«Eu non son quen de facer balance da miña xestión, iso que o fagan outros», respostaba ás preguntas de xornalistas sobre a súa traxectoria no Museo do Pobo Galego. «Cousas que quedan por facer?» Beramendi nomeu completar o programa museográfico, ampliar o cadro de persoal, «que é ridículo para o tamaño que ten este museo xa» e sobre todo, completar o relevo xeracional.
«Os que comezamos isto, a maior parte están mortos e os que non estamos mortos estamos cun pé no estribo», dicía con humor, e por iso, aínda que «non é doado» unha xeración posterior debe retomar, ou continuar, a empresa «co mesmo espírito co que se fundou».
Justo Beramendi (Madrid, 1941) participou xa na creación do Museo do Pobo Galego a mediados da década dos 70 e no seu padroado foi secretario (1976-1986), presidente de da Xunta Reitora (2000-2011) e presidente do propio padroado dende o ano 2011 ata finais deste mes.
