Sergio Rey gañou o Premio de Livros de Cordel do IES Marco do Camballón
VILA DE CRUCES
O Clube da Lingua do IES Marco do Camballón de Vila de Cruces xa ten gañador galego do I Premio Escolar Internacional de Livros de Cordel, coorganizado co instituto Rochael de Medeiros, de Recife, en Brasil. O premiado galego é Sergio Rey Dalama, de 13 anos, e estudante de primeiro da ESO do IES de Cacheiras.
A súa obra leva por título Um Dragão Campeão. Como premio a Rey lle corresponde un presente de carácter cultural por valor de 50 euros e 50 exemplares do seu libro, que será editado polo Clube da Lingua do instituto de Vila de Cruces. Varios centos de exemplares serán enviados a Brasil. Rey Dalama estuda portugués e participou no certame cun poema sobre o fútbol. Conta que no seu tempo libre xoga no S. R. Calo e tamén lle gustan os videoxogos. O IES Cacheiras conta con máis de 160 alumnos de portugués de primeiro da ESO a segundo de BAC.