Fernández Lores: «Os amigos dos meus fillos gustan das tortillas que fago»

Miguel Anxo Fernández Lores (Vilalonga, Sanxenxo, 1954) leva no Concello de Pontevedra nada menos que 32 anos. Doce como concelleiro da oposición, e os últimos vinte como alcalde. Neste tempo pasou de ser o único concelleiro do BNG na corporación a rozar a maioría absoluta nas últimas eleccións, e aspirar a lograla o vindeiro domingo. Polo menos así o apuntan as enquisas. É a cara visible da transformación nestas dúas décadas da cidade, que pasou de ser unha pequena capital de provincia a un referente mundial, cuxo modelo peonil ten sido recoñecido pola ONU en Dubai, e tamén en Nova York, en Hong Kong, en París, en Múnic, en México... Con todo, Lores afirma que «o mellor está por vir», que é o lema da súa campaña e tamén a frase que escribe para La Voz. E para os que din que está esgotado, canso e falto de ideas, responde que se atopa no mellor momento da súa vida política e persoal. Neste último mandato engadiu un novo logro ao seu currículo: converteuse en avó.

1. Cantas horas dorme ao día? Que soñou hoxe?

Durmo pouco, sobre 5 ou 6 horas, e cando a axenda mo permite compenso cunha sesta. E hoxe non soñei nada…

2. Que serie está a ver ou cal foi a última que viu? Ten plataformas de pago? 

Estou vendo Xogo de tronos. Xa rematei a quinta tempada, fáltanme a sexta e a sétima, polo que aínda non quero saber nada da oitava! Teño unha canle de pago para ver a oferta de deportes.

 

3. Se lle desen a elixir, con quen tomaría agora mesmo un café ou unha caña? E xa postos: café, caña, refresco...? 

Pois con Javi Gómez Noya, Saleta Castro e Pablo Dapena. Tamén con Ojea e con Cristian, polos seus éxitos no Multisport de Pontevedra, para comentar a xogada… Eu son de café, de caña ou dalgún viño, dependendo da hora.

4. Bote a vista atrás. A que lugar ou momento volvería? 

No político sempre vivo o presente, e no persoal estou no meu mellor momento, polo tanto ningún tempo pasado foi mellor.

5. Cando foi a última vez que invitou a alguén a tomar algo?

Pois onte mesmo viñeron cear á casa uns amigos dun dos meus fillos, que gustan moito das tortillas que fago.

6. E cando foi por última vez a cear con amigos? 

O sábado pasado. 

7. Cando chega a casa o primeiro que fai é... 

Agora mesmo, o primeiro que fago é visitar a camada de Lula, a cadela do meu fillo.

8.  Pola súa actividade política, a que non estaría disposto a renunciar? 

O que nunca fixen e nunca faría por política sería mentir e deixar de ser eu mesmo.

9. Ten seguro privado de saúde? E cantas tarxetas bancarias?  

Non, nin falta que me fai, porque a mellor sanidade é a pública. Teño dúas tarxetas bancarias, unha de débito e outra de crédito.

 

10. Ten coche? Cal e desde hai canto? E que móbil? 

Teño un Alfa Giulietta dende hai tres anos. O meu teléfono é un iPhone.

11. Ten vivenda en propiedade ou en alugueiro?

 Teño vivenda en propiedade compartida coa miña muller... e tamén co banco.

12. Que será o primeiro que fará o luns 27 de maio?

 O que facemos habitualmente nestes casos: reunir os concelleiros e analizar os resultados electorais.

O QUE DI A SÚA LETRA (POR LUIS ALAMANCOS, GRAFÓLOGO E RESPONSABLE DE INPEVAL)

ANALÍTICO E IRÓNICO. Destaca a súa capacidade de análise, con xambas longas. As letras T en maza e os finais longos e aceirados advirten sobre certa rudeza, suavizada cun toque de ironía. Os catro montes do eme reflicten o seu apego familiar. A sinatura, entrelazada co texto, é propia dos que se implican fondamente no que realizan.

---

---