Julio Abalde, reitor da Universidade da Coruña: «Coas novas titulacións damos resposta ás demandas que temos da sociedade»

En apenas seis días, o vindeiro 5 de setembro, a vida volverá aos campus das sete cidades galegas. E Julio Abalde, reitor da Universidade da Coruña, agarda que «se desenvolva con total normalidade». Como xa aconteceu o pasado cuadrimestre que rematou en xuño, a máscara será cousa do pasado nas aulas (só opcional) e queda atrás tamén a separación entre o alumnado. Será, pois, un curso marcado pola normalidade pospandémica, «tan necesaria» a ollos do reitor, e tamén por un estudantado desexoso de recuperar o perdido durante o peor da crise sanitaria. «Espero que o curso se desenvolva con total normalidade e que poidamos recuperar a vida nos campus e nas facultades da Universidade. É moi necesario despois de tres cursos», di o máximo responsable da Universidade a modo de desexo.

—Manterase dalgún xeito o protocolo covid?

—Este curso volvemos á normalidade prepandemia dende o punto de vista da organización, pero manteranse medidas para garantir a seguridade e a hixiene. A máscara será opcional, e recomendarase nalgunhas actividades. En conclusión, permanecen as pautas de hixiene que rexen na sociedade en xeral, pero non se empregará ningún protocolo covid como aconteceu nos pasados dous cursos.

—Haberá aínda aulas «online»?

—Recupérase totalmente a presencialidade e non haberá materias que se impartan exclusivamente en formato online. Non obstante, as aulas telemáticas manteranse para o alumnado que non poida ir á facultade, ou para complementar actividades presenciais nalgúns casos. Iso si, dependerá de cada materia, e de cada actividade.

—Quedan aínda prazas vacantes?

—Aínda hai ocos nalgúns graos de enxeñaría, e dos eidos xurídico-social e das humanidades. Pero quedan poucas, a maioría están absolutamente pechadas.

—Este curso será de estrea para algúns graos novos, coma o de Relacións Internacionais. Como están a resultar estas titulacións de recente creación?

—Creo que as novas titulacións que se puxeron en marcha dende hai catro anos están a ter moi boa acollida por parte dos estudantes, e están logrando pechar dun xeito rápido. É o caso dos graos en Intelixencia Artificial [compartido co resto das universidades públicas galegas], en Nanociencia e Nanotecnoloxía e en Xestión Dixital de Información e Documentación, impartidos no campus da Coruña; e das titulacións en Xestión Industrial da Moda, e en Relacións Internacionais no campus de Ferrol. Con estes programas estamos a dar resposta ás demandas dos diferentes sectores, e da sociedade en xeral. Estamos moi contentos coa resposta que están tendo.

—Relacións Internacionais pechou en Ferrol cunha nota de corte dun 9,2. Que supón isto para o campus da cidade naval?

—Supón un apoio importante, porque reforza a presenza do campus ferrolán no sistema universitario galego. E hai que lembrar que a cidade conta xa dende hai tempo con graos que teñen moita demanda, coma Enfermaría, Enxeñaría Industrial ou Xestión Industrial de Moda, que se imparte en modalidade bilingüe.

El lunes arranca el primer curso con plena normalidad en los campus: adiós a las clases «online» y mascarilla opcional

JORGE NOYA BOTANA / R. S.

---

---

---