A Xunta insistirálle ao Museo Marès de Barcelona para que devolva as esculturas do mosteiro de Carboeiro
GALICIA
O conselleiro de Cultura, José López Campos, enviou unha nova carga á institución catalá, que depende do Concello de Barcelona, para recuperar as pezas orixinarias de Silleda
14 mar 2025 . Actualizado a las 18:06 h.A directora xeral de Patrimonio Cultural, María del Carmen Martínez, anunciou este venres no Parlamento de Galicia que o Goberno galego lle insistirá ao Museo Frederic Marès de Barcelona para que proceda á devolución das dúas esculturas que se conservan alí e que pertenceron ao mosteiro de San Lorenzo de Carboeiro, no concello de Silleda. Así o confirmou a alto cargo da Consellería de Cultura en resposta a unha pregunta do BNG na comisión 4.ª do Parlamento, na que deu conta dos contactos que desde a Administración autonómica se mantiveron ata agora, con esta fin, coa institución catalá, que depende do Concello de Barcelona.
«O regreso deste valioso patrimonio é unha xusta reclamación de Galicia», defendeu a representante da Xunta, quen lembrou que, segundo as investigacións publicadas polo historiador Francisco Prado-Vilar, estas figuras foron espoliadas no pasado século do mosteiro pontevedrés e acabaron sendo adquiridas polo Museo Frederic Marès, descoñecedor desta substración ilegal. Trataríase dun Cristo en Maxestade e dunha talla con símbolos dos evanxelistas San Lucas e San Xoán, ambos os dous pertencentes a un tímpano do templo.
María del Carmen Martínez manifestou a «clara decisión» da Xunta de levar a cabo «todas as xestións necesarias» co obxecto de que estas esculturas regresen ao seu lugar de orixe. Con esta finalidade, a directora xeral confirmou que o propio conselleiro de Cultura, José López Campos, enviou unha nova carta ao museo catalán para insistir desde o Goberno galego nesta reclamación e acadar a súa recuperación.
Nesta mesma liña, salientou que estes esforzos de cara a estas dúas figuras inscríbense nas políticas de «consideración, defensa, protección e salvagarda» que se desenvolven desde a Xunta con respecto a todos os bens patrimoniais de Galicia, «aos que coidamos e protexemos por tratarse dun dos nosos maiores tesouros e legados», concluíu.
A intervención da directora xeral foi resposta a unha pregunta formulada polo BNG, asinada polas deputadas Ariadna Fernández e Mercedes Queixas, na que se interesaban polos trámites e prazos para recuperar esas dúas pezas que se conservan no Museo Marès de Barcelona.
O BNG acusou á Xunta de «deixadez total de funcións» á hora de adoptar medidas contundentes e de poñer prazos para recuperar as pezas «arrincadas literalmente» nos anos 50 do mosteiro declarado Ben de Interese Cultural. A deputada Ariadna Fernández, na súa intervención na Comisión de Cultura, acusou o Goberno galego de non ser capaces de restituír as pezas malia a que «lle deron o traballo feito» e falou de «falta de respecto» ao investigador da Universidade de Santiago, Francisco Prado-Vilar, que foi quen axudou coas súas pesquisas a localizar as pezas. «Hai probas de que as pezas foron espoliadas e o museo non oculta de onde proceden pero vostedes non son capaces de que nos devolvan o que é noso por lei. É unha vergonza para o Goberno galego e unha falta de respecto ao mosteiro e ao noso patrimonio», afirmou Fernández.
«En lugar de adoptar unha postura firme e reclamar o que por dereito e lei é noso, pásanlle a pelota ao Ministerio, cando son vostedes os que teñen a responsabilidade», recriminou Fernández, quen dixo tamén que «non foron capaces de sentar nunha mesa as administracións competentes implicadas, os expertos na materia e a dirección do museo e explicar a situación e as posibles vías para que as pezas volvan a Galiza».