Os cigarróns de Verín e os boteiros e fulións de Viana do Bolo, protagonistas este sábado en Balaídos 

O Celta vén de anunciar a celebración este sábado en Balaídos da primeira edición dunha homenaxe ao Entroido galego por parte do club. Neste caso, o protagonismo será para os cigarróns de Verín e os boteiros e fulións de Viana do Bolo, que saltarán ao céspede do estadio pouco antes da saída dos xogadores no encontro fronte ao Leganés, «enchendo de cor e enerxía o ambiente e poñendo en valor unha tradición que se remonta por centos de anos atrás», din desde a entidade.

A intención do club é que, cada ano, Balaídos renda homenaxe a diferentes figuras do Entroido, recoñecendo así a riqueza e variedade desta festividade en toda Galicia. «O Celta dá un paso máis no seu afán por dar visibilidade e poñer en valor, cun gran orgullo, o patrimonio cultural de Galicia», indican nun comunicado. Esta iniciativa desenvolverase nun día de dobre partido, pois á cita do primeiro equipo masculino (14.00) súmase a do feminino, As Celtas, ante o Deportivo B, ás 19.00. Entre medias, a celebración continuará nos exteriores do estadio.

? O Entroido celébrase en #AbancaBalaídos!

? Os Cigarróns de Verín e os Boteiros e Folións de Viana do Bolo, protagonistas na primeira edición da homenaxe ao Entroido galego.

? Un paso máis no noso afán por poñer en valor, cun gran orgullo, o patrimonio cultural galego.

— RC Celta (@RCCelta) March 4, 2025

O club tamén avanza que para amenizar a espera entre ambos os encontros, «poderase gozar de comida típica destas datas, como filloas, orellas e flores de entroido, así como empanada galega». Sinalan que será «unha oportunidade perfecta para que a afección celeste goce dunha xornada de fútbol e tradición nun ambiente festivo e auténtico». Sobre o Entroido, engaden: «A riqueza e diversidade desta festividade convértena nun tesouro cultural que o Celta quere contribuír a transmitir ás novas xeracións e dar a coñecer ante toda a audiencia de LaLiga».

---

---

---