Xa hai premios para o concurso de fotografía sobre saúde mental que organiza Albores

A asociación Albores Saúde Mental xa ten gañadores para o Certame de Fotografía Fotoxénica Mente. O gañador da edición 2024 deste certame é Iago Manuel Souto Lorenzo, que conseguiu o primeiro premio cunha imaxe titulada «O Camiño de volta». Os organizadores explican que este concurso anual ten como obxectivo promover a reflexión sobre a saúde mental.

O concurso reparte todos os anos tres premios principais que inclúen diñeiro en metálico e un diploma. No caso do primeiro premio, ademais a fotografía será difundida no vindeiro cartel que edite Albores para conmemorar o día mundial da saúde men1tal. Os premios son o resultado da votación do xurado, integrado por persoas relacionadas cos servizos sociais e a comunicación.

A lista de galardoados deste ano ábrese con este «O camiño de volta», de Iago Manuel Souto Lorenzo, ao que lle corresponde o premio de 200 euros. O segundo premio, dotado con 75 euros, correspóndelle a «Cicatrices da miña coiraza», de Pablo Mateo Bernal Agulla. E o terceiro é para «Ying e Yang», cuxa autora se identifica unicamente como Lola.

Os concursantes presentaron as súas imaxes acompañadas de textos para relacionalas co lema da convocatoria deste ano, que este ano foi «A saúde mental como dereito universal». En Albores explican que se seleccionaron ese lema foi porque «a Organización Mundial da Saúde o tomou para a última campaña do Día Mundial da Saúde Mental, ao considerar que está subestimada en comparación coa saúde física».

Para reforzar esta idea, os portavoces de Albores subliñan que os datos da ONU revelan que a nivel mundial só o 7% dos orzamentos sanitarios van destinados a abordar cuestión relacionadas coa saúde mental, a pesar de que entre eles cóntanse «problemáticas de saúde pública tan graves coma o suicidio, que afecta con especial incidencia a zonas como a provincia de Lugo, a segunda no ranking de suicidios de España».

---

---

---