Entre os próximos días 20 e 23 haberá proxeccións cinematográficas e actividades gastronómicas en Bóveda, Monforte, Chantada e Sober
17 mar 2025 . Actualizado a las 16:41 h.O festival de cinema portugués Vendaval, organizado polo centro cultural A Casa da Memoria —con sede na aldea de Xullán, en Bóveda— celebrou en agosto do 2024 súa primeira edición, que se desenvolveu neste municipio e no de Monforte. O filmes que se proxectaron nesta mostra poderán verse nunha edición de primavera que se celebrará entre os próximos días 20 e 23 e que se ampliará a outros municipios da Ribeira Sacra. O programa complementarase con varias actividades gastronómicas. A iniciativa conta co apio da Vicepresidencia de Cultura da Deputación lucense.
A continuación detállanse as actividades previstas para estas xornadas:
20 de marzo. A Casa de Cultura de Monforte acollerá a partir das 16.30 horas a proxección dos filmes O casaco rosa, de Mónica Santos, e Tão pequeninas, tinham o ar de serem já crescidas, de Tânia Dinis. Ese día ofrecerase tamén unha cata de viños portugueses no restaurante Trespés, na mesma localidade, ás 21.00 horas. A cata comprenderá catro viños, catro tapas e a proxección do filme Cartas a uma ditadura, de Inês de Medeiros. O prezo para esta actividade é de 25 euros por persoa. Para asistir é precio realizar unha reserva previa chamando ao teléfono 661 43 43 36.
21 de marzo. Ás 19.30 horas proxectarase o filme Prazer, camaradas!, de José Filipe Costa, na sala Cinema Palleiriso, na localidade de Garabelos, pertencente á parroquia de Mariz, en Chantada.
22 de marzo. A Casa de Cultura de Sober acollerá a partir das 19.30 horas a proxección do filme 48, de Susana Sousa Dias.
23 de marzo. No centro cultural A Casa de Memoria, en Xullán, proxectarase ás 16.30 horas o filme Batida de Lisboa, de Rita Maia e Vasco Viana. Ese mesmo día e no mesmo lugar haberá un xantar popular a partir das 14.00 horas.